بی جے پی سے اتحاد پر آر ایل ڈی میں زبردست ناراضگی، پارٹی کے قومی نائب صدر نے دیا استعفیٰ

لوک سبھا انتخابات کے دوسرے مرحلے کے لیے پرچۂ نامزدگی داخل کرنے کا عمل شروع ہے، مگر جینت چودھری کی پارٹی آر ایل ڈی کی مشکلیں ہیں کہ کم ہونے کا نام ہی نہیں لے رہی ہیں۔ بی جے پی سے اتحاد پر ابھی تک پارٹی کے اندرسے ناراضگی کی خبریں آ رہی تھیں، مگر اب یہ ناراضگی بغاوت کی شکل اختیار کرتی جا رہی ہے۔ تازہ ترین معاملہ پارٹی کے قومی نائب صدر کے پارٹی چھوڑنے کا ہے، جنہوں نے بی جے پی کے اتحاد سے ناراض ہوکر پارٹی کے اپنے عہدے و بنیادی رکنیت سے استعفی دے دیا ہے۔

لوک سبھا انتخابات کے شیڈول کے مطابق مغربی اترپردیش کی بیشتر سیٹوں پر پہلے اور دوسرے مرحلے میں انتخابات ہونے ہیں۔ گزشتہ چند انتخابات کے دوران ان علاقوں میں این ڈی اے کو مغربی یوپی سے کافی سیٹیں ملیں جسے ووٹوں کی تقسیم کا نتیجہ بھی کہا جاتا رہا ہے۔ اسی مغربی یوپی میں جینت چودھری کی آر ایل ڈی کی بھی مضبوط پکڑ مانی جاتی رہی ہے جو گزشتہ دنوں این ڈ ی اے میں شامل ہوگئی۔ اتوار (31 مارچ) کو میرٹھ میں ہوئی پی ایم نریندر مودی کی ریلی میں جینت چودھری بھی اسٹیج پر موجود تھے۔ لیکن ابھی ریلی کو ہوئے 24 گھنٹے بھی نہیں گزرے تھے کہ جینت چودھری کو بڑا جھٹکا لگ گیا۔

آر ایل ڈی اور جینت چودھری کو یہ جھٹکا پارٹی کے قومی نائب صدر شاہد صدیقی کے استعفیٰ کی صورت میں لگا ہے۔ شاہد صدیقی نے اپنا استعفی جینت چودھری کو بھیج دیا ہے۔ انہوں نے یہ معلومات سوشل میڈیا کے پلیٹ فارم ’ایکس‘پر شیئر کی ہے۔ اپنی پوسٹ میں انہوں نے لکھا ہے کہ ’’کل میں نے راشٹریہ لوک دل کی رکنیت اور قومی نائب صدر کے عہدے سے اپنا استعفیٰ قومی صدر جینت سنگھ کو بھیج دیا ہے۔‘‘ انہوں نے اپنی پوسٹ میں مزید لکھا ہے کہ ’’آج جب ہندوستان کا آئین اور جمہوری ڈھانچہ خطرے میں ہے، خاموش رہنا گناہ ہے۔ میں جینت جی کا شکر گزار ہوں مگر بھاری دل کے ساتھ میں خود کو آر ایل ڈی سے دور کرنے پر مجبور ہوں۔ ہندوستان کا اتحاد، سالمیت، ترقی اور بھائی چارہ سب سے بالاتر اور عزیز ہے۔ اسے بچانا ہر شہری کی ذمہ داری اور فرض ہے۔‘‘

سابق آر ایل ڈی لیڈر نے ایک دیگر پوسٹ میں لکھا ہے  ’’میں نے اپنا استعفیٰ راشٹریہ لوک دل کے صدر محترم جینت چودھری کو بھیج دیا ہے۔ میں خاموشی سے ملک کے جمہوری ڈھانچے کو ختم ہوتے نہیں دیکھ سکتا۔ میں جینت سنگھ جی اور آر ایل ڈی میں اپنے ساتھیوں کا شکر گزار ہوں۔ شکریہ۔‘‘ واضح رہے کہ سابق وزیر اعظم چودھری چرن سنگھ کو بھارت رتن دینے کے بعد جینت چودھری نے این ڈی اے میں شامل ہونے کا اعلان کیا تھا۔ این ڈی اے اتحاد میں آر ایل ڈی کو دو لوک سبھا سیٹیں ملی ہیں۔ وہیں پارٹی کو ایک ایم ایل سی کی سیٹ بھی دی گئی ہے۔