’ڈیزل، پٹرول اور پکوان گیس کی قیمتیں آسمان پر، بھکمری جیسے حالات!‘

پرتاپ گڑھ: ساٹھ سال کے بمقابلہ ساٹھ ماہ کی بات کرنے والی بی جے پی حکومت مہنگائی کے نام پر لوگوں کو دھوکہ دے رہی ہے۔ آج ڈیزل، پٹرول و پکوان گیس کی قیمتیں آسمان پر ہے، یہاں تک کہ کھانے پینے کی اشیاء مہنگی ہونے کے سبب روز بروز بھکمری جیسے حالات پیدا ہوتے جا رہے ہیں۔

پٹرولیم مصنوعات کی قیمتوں میں اضافے سے عوام متاثر و شدید پریشان ہے ۔پیس پارٹی کے قومی صدر ڈاکٹر ایوب سرجن نے جاری پریس ریلیز کے ذریعہ منگائی کے اضافے کی مزید مذمت کرتے ہوئے کہا کہ حکومت میں اگر ذرا سی بھی غیرت باقی ہے تو وہ مہنگائی پر فوراً کنٹرول کرے۔

ڈاکٹر ایوب سرجن نے کہا کہ نہروں میں پانی نہیں ہونے کے سبب کسان اپنی فصلوں کی آبپاشی کے لیئے ٹیوب ویل جیسے وسائل کا استعمال کرتے ہیں ،لیکن ڈیزل کی قیمتوں میں اضافے نے اس کی کمر توڑ کر رکھ دی ہے ۔کانگریس کے زیر اقتدار یہی موجودہ حکومت سے وابستہ بی جے پی کے لوگ پٹرولیم مصنوعات کی قیمت کم ہونے کے باوجود قیمتوں میں اضافے کا شور مچا کر سڑکوں پر نیم برہنہ ہو کر احتجاج کرتے تھے وہی آج زیر اقتدار و خاموش تماشائی اور کنٹرول کرنے سے قاصر ہیں ،جو انتہائی بدقسمتی کی بات ہے ۔ روز بروز پٹرولیم مصنوعات کی قیمتوں میں اضافہ کے سبب اس کا براہ راست اثر کاروبار و روزی روٹی بلکہ عام عوام پر ہے۔

ڈاکٹر ایوب نے کہا کہ پکوان گیس جس کا استعمال ہر شخص کر رہا ہے اس کی قیمتوں میں انتہائی اضافے اور سبسڈی بند کر حکومت عام عوام کے منہ سے لقمہ چھیننے کا کام کررہی ہے ۔ سو دو سو روپیہ یومیہ کمانے والا شخص اب اس مہنگائی میں کیسے گزر بسر کرے یہ ایک اہم سوال ہے ۔آج مہنگائی کے سبب لوگ خود کشی کے دہانے پر پہونچ چکے ہیں ۔انہوں نے حکومت سے مطالبہ کیا کہ وہ سب سے پہلے مہنگائی پر کنٹرول کرے ،اور ایسا ٹھوس قدم اٹھائے جس سے عام عوام کو براہ راست راحت مل سکے۔پیس پارٹی مہنگائی کے اضافے کی سخت مذمت کرتی ہے اور جلد ہی اس کے خلاف احتجاج کرے گی۔