یومِ جمہوریہ: سخت حفاظتی حصار میں دہلی، راج پتھ کے ارد گرد 300 کیمرے نصب

نئی ​​دہلی: یوم جمہوریہ کے موقع پر قومی راجدھانی میں خاص طور پر راج پتھ کے آس پاس سیکورٹی سخت کر دی گئی ہے۔ ایک سینئر پولیس افسر نے کہا، ’’ایسے مواقع (یوم جمہوریہ) پر، دہلی پولیس الرٹ جاری کرتی ہے۔ ہم کسی بھی خطرے کا مقابلہ کرنے کے لیے اپنی مستعدی، موجودگی اور جانچ میں اضافہ کرتے ہیں۔‘‘

اس وقت شہر میں 71 ڈپٹی کمشنر آف پولیس (ڈی سی پی)، 213 اے سی پی، 713 انسپکٹرز، دہلی پولیس کمانڈوز، 71 مسلح بٹالین کے افسران اور جوانوں سمیت کل 27723 اہلکار اور سینٹرل آرمڈ پولیس فورس کی 65 کمپنیاں تعینات ہیں۔ حال ہی میں دہلی پولیس کمشنر راکیش استھانہ نے کہا تھا کہ پولیس گزشتہ دو ماہ سے قومی راجدھانی میں انسداد دہشت گردی کے اقدامات کو تیز کر رہی ہے۔

استھانہ نے کہا، ’’دہلی ہمیشہ سے ہی سماج دشمن عناصر کے نشانے پر رہی ہے۔ اس سال بھی ہم چوکس ہیں۔ پچھلے دو مہینوں سے ہم دیگر سیکورٹی ایجنسیوں کے ساتھ مل کر دہلی میں انسداد دہشت گردی کے اقدامات کر رہے ہیں۔" آئی اے این ایس سے بات کرتے ہوئے ڈپٹی کمشنر آف پولیس (نئی دہلی ضلع) دیپک یادو نے کہا کہ یوم جمہوریہ کے موقع پر راج پتھ اور اس کے آس پاس کافی انتظامات کیے گئے ہیں۔

یادو نے کہا، "چہرے کی شناخت کی خصوصیت کے ساتھ تقریباً 300 کیمرے راج پتھ کے ارد گرد نصب کیے گئے ہیں تاکہ کسی بھی خطرے کو پیشگی طور پر ناکام بنایا جا سکے۔" نئی دہلی کے ڈی سی پی نے کہا کہ کسی بھی خطرے سے نمٹنے کے لیے دہلی پولیس اور نیم فوجی دستوں کے خصوصی تربیت یافتہ کمانڈوز کو تعینات کیا گیا ہے۔ یادو نے کہا، "پولیس کمانڈوز کے علاوہ سواٹ، اسپیشل سیل اور این ایس جی کی ہٹ ٹیمیں بھی تعینات ہیں۔‘‘