منریگا : واجبات کی ادائیگی پر حکومت کی غلط بیانی

دیہی ترقی کی وزارت نے گزشتہ دنوں اعلان کیا تھا کہ رواں مالی سال میں منریگا کے تحت 85 فیصد واجبات کی ادائیگی کر دی گئی ہے جبکہ ایک تحقیقی رپورٹ کے مطابق ابھی تک محض 32 فیصد کی ہی ادائیگی ہوئی ہے۔

منریگا کے حوالے سے ایک تازہ تحقیق میں کئی حیرت انگیز حقائق کا انکشاف ہوا ہے جن سے حکومت کے دعوےسرے سے خارج ہو جاتے ہیں ۔ سب سے بڑی بات تو یہ ہے کہ دیہی ترقی کی وزارت نے گزشتہ دنوں کہا تھا کہ رواں مالی سال میں منریگا کے تحت 85 فیصد واجبات کی ادائیگی کر دی گئی ہے۔ جبکہ تحقیقی رپورٹ کے مطابق اب تک محض 32 فیصد واجبات کو ہی ادا کیا گیا ہے۔

تحقیقی رپورٹ میں اس اہم بات کا بھی تذکرہ کیا گیا ہے کہ آئندہ مالی سال 2017 کی پہلی سہ ماہی میں ہی منریگا کے لئے مختص بجٹ کا 90 فیصد حصہ خرچ کیا جا چکا ہے۔ ایسے حالات میں بڑا سوال یہ ہے کہ منریگا میں کام کرنے والے مزدوروں کے بقیہ واجبات کس طرح ادا کیے جائیں گے؟

یکم دسمبر کو ’نریگا سنگھرش مورچہ ‘ کے سماجی کارکنان راجندرن نارائنن، سکینہ دھوراجی والا اور راجیش گولانی کی طرف سے کی گئی تحقیق ،ادائیگی میں ہو رہی تاخیر پر مبنی رپورٹ کو میڈیا کے ساتھ اشتراک کیا گیا ہے۔ راجندرن نے کہا کہ اس تحقیق میں مالی سال 2018 کی پہلی دو سہ ماہیوں میں 10 ریاستوں کی 3603 پنچایتوں میں ہوئے تقریباً 45 لاکھ روپے کے لین دین کی تفصیلات کا مطالعہ کیا گیا ہے۔ اہم بات یہ ہے کہ اس کے لئے دیہی ترقی کی وزارت کے اعداد و شمار کا کثرت سے استعمال کیا گیا ہے۔

نریگا سنگھرش مورچہ سے وابستہ کارکنان اس سے قبل بھی مرکزی حکومت کے داعوں اور منشا پر شبہ ظاہر کر چکے ہیں۔ 2016 میں سوراج ابھیان کے رہنما یوگیندر یادو کی عرضی پر سماعت کرتے ہوئے سپریم کورٹ نے مرکزی حکومت سے منریگا کے تحت بقیہ واجبات کو جلد سے جلد ادا کرنے کو کہا گیاتھا۔ اس معاملہ میں سینئر وکیل پرشانت بھوشن نے منریگا کے مزدوروں کا حق عدالت کے سامنے رکھا تھا۔ پریس کانفرنس میں پرشانت بھوشن نے کہا تھاکہ منریگا اسکیم کو مودی حکومت بند کرنے کی سازش رچ رہی ہے۔ یوگیندر یادو کا کہنا تھا کہ گزشتہ کئی سالوں سے مزدوروں کا پیسہ روک کر رکھا گیا ہے اور یہ تاخیر جان بوجھ کر کی جا رہی ہے۔

نریگا سنگھرش مورچہ کا کہنا ہے کہ مالی سال 2018 کی شروعات سے ہی انہوں نے واجبات کی ادائیگی کی طرف توجہ مرکوز کرائی تھی ۔ دیہی ترقی کی وزارت میں تاخیر کے حوالے سے تیار کی گئی رپورٹ کا مطالعہ کیا گیا اور عبوری خط میں منریگا میں جاری ان مسائل کا اعتراف بھی کیا ۔

مورچہ کا دعویٰ ہے کہ مطلوبہ فنڈ کی کمی کی وجہ سے ایسے مسائل سامنے آ رہے ہیں اور ایک مطالبات پر مبنی پروگرام کا مقصد ہی راہ سے بھٹک گیا ہے۔

سپریم کورٹ کے فیصلے کے پیش نظر انہوں نے مطالبہ کیاہے کہ جلد از جلد تمام بقیہ واجبات کی ادائیگی کی جائے ، مزدوری کی ادائیگی میں ریاستی اور مرکزی سطح پر ہوئی تاخیر کا مزدوروں کو پورا معاوضہ دیا جائے، منریگا اسکیم کے لئے ضروری فنڈ کا انتظام کیا جائے اور مانگ کی بنیاد پر کام دیا جائے۔