ریلائنس انڈسٹریز کو مارکیٹ کیپ میں بڑا نقصان، سب سے مالدار کمپنی ہونے کا مقام خطرے میں

ہندوستانی شیئر بازار کی رفتار اس ہفتے خاصی سست رہی اور پورے ہفتے اسٹاک مارکیٹ میں گراوٹ کا رجحان جاری رہا۔ اس کی سب سے بڑی وجہ عالمی سطح پر کئی اہم ایونٹس کا ہونا تھا، جن میں امریکی صدارتی انتخاب بھی شامل تھا۔ ڈونلڈ ٹرمپ کی جیت کے بعد شیئر مارکیٹ میں کچھ بہتری آئی، مگر یہ تیزی صرف دو دن تک برقرار رہ سکی۔ جمعرات اور جمعہ کو گھریلو شیئر بازار میں زبردست گراوٹ دیکھنے کو ملی، جس کے نتیجے میں سینسیکس اور نفٹی نچلی سطح پر بند ہوئے۔ گزشتہ ہفتے بی ایس ای سینسیکس میں 237.8 پوائنٹس یا 0.29 فیصد کی کمی آئی، جو اس سے پچھلے ہفتے کے کاروبار کے مقابلے میں کم سطح پر رہی۔

ملک کی سرفہرست 10 کمپنیوں میں سے 6 کی مارکیٹ کیپ میں گزشتہ ہفتے 1،55،721.12 کروڑ روپے کی کمی آئی۔ سب سے زیادہ نقصان ریلائنس انڈسٹریز کو ہوا، جب کہ بھارتی ایئرٹیل، آئی سی آئی سی آئی بینک، آئی ٹی سی، ہندوستان یونی لیور اور لائف انشورنس کارپوریشن (ایل آئی سی) کی مالیت میں کمی آئی۔ اس کے برعکس، ٹاٹا کنسلٹنسی سروسز (ٹی سی ایس)، ایچ ڈی ایف سی بینک، انفوسس اور اسٹیٹ بینک آف انڈیا کو فائدہ ہوا۔

ریلائنس انڈسٹریز کی مالیت 74،563.37 کروڑ روپے سے گھٹ کر 17،37،556.68 کروڑ روپے رہ گئی۔ بھارتی ایئرٹیل کی مالیت 26،274.75 کروڑ روپے سے گھٹ کر 8،94024.60 کروڑ روپے رہ گئی۔ اسی طرح، آئی سی آئی سی آئی بینک کی مالیت 22،54.79 کروڑ روپے سے گھٹ کر 8،88،432.06 کروڑ روپے، اور آئی ٹی سی کی مالیت 15،449.47 کروڑ روپے سے گھٹ کر 5،98،213.49 کروڑ روپے رہ گئی۔ ایل آئی سی اور ہندوستان یونی لیور کی مارکیٹ کیپ میں بالترتیب 9،930.25 کروڑ روپے اور 7،248.49 کروڑ روپے کی کمی آئی۔

دوسری جانب، ملک کی سب سے بڑی آئی ٹی کمپنی ٹی سی ایس کی مالیت 57،744.68 کروڑ روپے سے بڑھ کر 14،99،697.28 کروڑ روپے ہو گئی۔ انفوسس کی مالیت 28،838.95 کروڑ روپے سے بڑھ کر 7،60،281.13 کروڑ روپے اور اسٹیٹ بینک آف انڈیا کی مالیت 19،812.65 کروڑ روپے سے بڑھ کر 7،52،568.58 کروڑ روپے ہو گئی۔

ریلائنس انڈسٹریز مارکیٹ کیپ کے لحاظ سے اب بھی ملک کی سب سے بڑی کمپنی ہے، اس کے بعد ٹی سی ایس، ایچ ڈی ایف سی بینک، بھارتی ایئرٹیل، آئی سی آئی سی آئی بینک، انفوسس، اسٹیٹ بینک آف انڈیا، آئی ٹی سی، ہندوستان یونی لیور اور ایل آئی سی کا نمبر آتا ہے۔