دہلی میں 54 لاکھ سے زیادہ پرانی گاڑیوں کا رجسٹریشن منسوخ

نئی دہلی: دہلی ٹرانسپورٹ ڈپارٹمنٹ نے 31 جنوری تک 54,42,267 گاڑیوں کا رجسٹریشن ختم کر دیا ہے، جن میں 10 سال پرانی ڈیزل گاڑیاں اور 15 سال پرانی پٹرول/سی این جی گاڑیاں شامل ہیں۔ یہ اطلاع جمعرات کو پارلیمنٹ میں دی گئی۔

روڈ ٹرانسپورٹ اور ہائی ویز کے وزیر مملکت وی کے سنگھ نے ایک تحریری جواب میں لوک سبھا کو بتایا کہ نیشنل گرین ٹریبونل (این جی ٹی) نے 26 نومبر 2014 کے اپنے حکم کے ذریعے دہلی میں 15 سال سے زیادہ پرانی تمام گاڑیوں کو چلانے پر پابندی لگا دی ہے اور 7 اپریل 2015 کے اپنے حکم کے ذریعے یہ ہدایت دی ہے کہ 10 سال سے زیادہ پرانی تمام ڈیزل گاڑیوں کو دہلی-این سی آر کی سڑکوں پر چلنے کی اجازت نہیں ہوگی۔

جواب کے مطابق، سپریم کورٹ نے 29 اکتوبر 2018 کے اپنے حکم کے ذریعے ہدایت کی کہ 10 سال سے پرانی تمام ڈیزل گاڑیاں اور 15 سال سے زیادہ پرانی پٹرول گاڑیاں نیشنل گرین ٹریبونل کے حکم کے مطابق نہیں چلیں گی۔

این سی ٹی دہلی کی حکومت کا انفورسمنٹ ونگ باقاعدگی سے 10 سال سے پرانی ڈیزل گاڑیوں اور 15 سال سے زیادہ پرانی پٹرول گاڑیوں کی جانچ کرتا ہے۔ یکم جنوری 2014 سے 31 جنوری 2023 تک انفورسمنٹ برانچ نے 10 سال پرانی 446 گاڑیاں اور 15 سال پرانی 12959 گاڑیاں (پٹرول/ڈیزل) ضبط کی تھیں۔ ضبط شدہ گاڑیوں کو آگے اسکریپرز کے حوالے کیا جا رہا ہے۔

دہلی حکومت نے 24 اگست 2018 کو دہلی میں موٹر گاڑیوں کی اسکریپنگ کے لیے رہنما خطوط بھی جاری کیے تھیں۔ اس نے موٹر وہیکلز (وہیکل سکریپنگ سہولت کی رجسٹریشن اور فنکشننگ) رولز، 2021 (آر وی ایس ایف) کو اپنایا ہے، جس میں وزارت کی طرف سے وقتاً فوقتاً مطلع اور ترمیم کی جاتی ہے۔