آر سی پی سنگھ نے اپنے ٹوئٹر بایو سے جنتا دل یو کا نام ہٹایا، پی ایم مودی کی ڈالی تصویر!

بہار سے راجیہ سبھا کے لیے نامزدگی کو لے کر کشمکش کی حالت کے درمیان مرکزی وزیر اور جنتا دل یو کے سینئر لیڈر آر سی پی سنگھ نے بدھ کو بہار کے وزیر اعلیٰ نتیش کمار کے ساتھ نااتفاقی سے ضروری انکار کیا، لیکن اس درمیان انھوں نے اپنے ٹوئٹر بایو سے جنتا دل یو کا نام ہٹا دیا۔ آر سی پی سنگھ نے ٹوئٹر پروفائل میں ’آزادی کا امرت مہوتسو‘ کے پیغام کے ساتھ وزیر اعظم نریندر مودی کی تصویر ڈالی ہے۔

آر سی پی سنگھ نے آج میڈیا سے بات کرتے ہوئے کہا کہ ان کے اور وزیر اعلیٰ کے درمیان کوئی مسئلہ نہیں ہے اور بدھ کی شام وہ پٹنہ جا رہے ہیں۔ انھوں نے کہا کہ ’’وزیر اعلیٰ سے کسی ایشو پر کوئی نااتفاقی نہیں ہے۔ راجیہ سبھا کے لیے نامزدگی کی تاریخ 24 سے 31 مئی تک ہے اور آج مرکزی کابینہ کی میٹنگ ہے۔ اس لیے آج شام کو میں پٹنہ جا رہا ہوں۔‘‘ یہ پوچھے جانے پر کہ انھوں نے بہار کے وزیر اعلیٰ نتیش کمار کے اتفاق کے بغیر مرکزی وزیر کے طور پر حلف لیا، آر سی پی سنگھ نے اسے افواہ بتایا اور کہا کہ انھوں نے وزیر اعلیٰ کی مرضی سے ہی حلف لیا ہے۔

بہرحال، سیاسی گلیاروں میں قیاس آرائیاں ہو رہی ہیں کہ نتیش کمار اور آر سی پی سنگھ کے درمیان رشتے تلخ ہو گئے ہیں۔ انھوں نے گزشتہ سال مرکزی کابینہ میں ہوئے رد و بدل میں جنتا دل یو سے واحد وزیر کی شکل میں حلف لیا تھا۔ اس درمیان سنگھ کے راجیہ سبھا کے لیے نامزدگی کو لے کر پوری طرح سے غیر یقینی کی صورت حال ہے۔ ان کی مدت کار آئندہ مہینے ختم ہو جائے گی۔