روزہ و افطار کے تعلق سے حدیث و روایت... (1)

رمضان المبارک کا مقدس مہینہ آ چکا ہے اور آج ہندوستان میں پہلا روزہ ہے۔ ہم 'قومی آواز' کے قارئین کے لیے اس پاکیزہ مہینے میں روزہ و افطار کے تعلق سے روزانہ کچھ حدیث و روایت پیش کریں گے تاکہ آپ روزہ و افطار کی اہمیت و افادیت سے روشناس ہو سکیں اور آپ کی معلومات میں بھی اضافہ ہو۔ تو لیجیے پیش ہے اس سلسلہ کی پہلی قسط...

• رمضان المبارک میں افطاری کرنے کی بہت فضیلت ہے۔ حضرت سہل بن سعد رضی اللہ عنہ سے مروی ہے کہ حضور نبی اکرم صلی اللہ علیہ وآلہ وسلم نے فرمایا (ترجمہ) ’’میری امت کے لوگ بھلائی پر رہیں گے جب تک وہ افطار میں جلدی کرتے رہیں گے۔‘‘ (مسلم، الصحيح، کتاب الصيام، باب فضل السحور و تاکيد استحبابه، 2:771، رقم: 1098)

• حضرت ابو ہریرہ رضی اللہ عنہ سے مروی حدیث قدسی میں ﷲ تعالیٰ فرماتا ہے (ترجمہ) ”میرے بندوں میں مجھے پیارے وہ ہیں جو افطار میں جلدی کریں۔‘‘ (ابن حبان، الصحيح، 4:558، رقم: 1670)