شہریت قانون پر مشکل میں مودی حکومت، پاسوان نے دیا بڑا بیان

شہریت ترمیمی قانون کے خلاف ملک بھر میں احتجاجی مظاہرہ کے درمیان بی جے پی کی معاون پارٹی ایل جے پی کے سینئر لیڈر رام ولاس پاسوان نے ایک ایسا بیان دیا ہے جو پی ایم مودی اور وزیر داخلہ امت شاہ کی پیشانی پر شکن لانے والا ہے۔ پاسوان نے شہریت قانون سے متعلق اپنا رد عمل ظاہر کرتے ہوئے کہا ہے کہ ’’میں نے زندگی بھر دلتوں، قبائلیوں اور پسماندہ طبقات کے حقوق کے لیے جدوجہد کی ہے۔ سماجی انصاف اور سیکولرزم میرا اور میری پارٹی ایل جے پی کا مشن ہے۔ کوئی بھی حکومت شہریت تو دور، ان کے حقوق پر انگلی نہیں اٹھا سکتی ہے۔‘‘

پاسوان نے اس سلسلے میں کچھ ٹوئٹس بھی کیے ہیں۔ ایک ٹوئٹ میں انھوں نے لکھا ہے کہ ’’چاہے دلت ہوں، قبائلی ہوں، پسماندہ طبقہ سے جڑے لوگ ہوں یا پھر اعلیٰ ذات سے منسلک افراد ہوں، یہ سبھی ملک کے حقیقی شہری ہیں۔ شہریت ان کا پیدائشی حق ہے۔ اسے کوئی بھی حکومت چھین نہیں سکتی۔ کسی بھی ہندوستانی شہری کو بلاوجہ پریشان نہیں کیا جائے گا۔‘‘

این پی آر سے متعلق اپنی رائے ظاہر کرتے ہوئے ایل جے پی کے سینئر لیڈر پاسوان نے کہا کہ ’’جہاں تک قومی شہری رجسٹر کا سوال ہے، اس پر اب تک کوئی بحث نہیں ہوئی ہے، لیکن اس کا کسی مذہب سے کوئی تعلق نہیں ہے اور کسی بھی شخص کو مذہب کی بنیاد پر شہریت سے محروم نہیں کیا جا سکتا ہے۔‘‘

واضح رہے کہ شہریت ترمیمی قانون کو لے کر ملک کے کئی حصوں میں تقریباً 20 دنوں سے احتجاجی مظاہرہ کیا جا رہا ہے۔ دہلی، یو پی، بہار سمیت کئی ریاستوں میں پرتشدد مظاہرے گزشتہ کچھ دنوں میں دیکھنے کو ملے ہیں۔ اتر پردیش میں تشدد میں کئی لوگوں کی موت بھی ہو گئی تھی۔ دوسری طرف دہلی میں اب بھی شہریت قانون، این آر سی اور این پی آر کے خلاف احتجاجی مظاہرے جاری ہیں۔ دہلی کے جامعہ ملیہ اسلامیہ یونیورسٹی میں لگاتار اس قانون کے خلاف طلبا و طالبات مظاہرے کر رہے ہیں۔ مظاہرین کا مطالبہ ہے کہ شہریت قانون اور این آر سی کو حکومت واپس لے۔