'ترنگے کی توہین کرنے والے کو گرفتار کریں' وزیر اعظم مودی کے بیان پر راکیش ٹکیت کا ردعمل

نئی دہلی: وزیر اعظم نریندر مودی نے اپنے ماہانہ ریڈیو پروگرام ’من کی بات‘ میں کہا کہ 26 جنوری کو لال قلعہ پر ترنگے کی توہین دیکھ کر ملک بہت غمزدہ ہوا ہے۔ زرعی قوانین کے خلاف احتجاج کرنے والے کسان رہنما راکیش ٹکیت نے وزیر اعظم مودی کے اس تبصرے پر اپنا رد عمل ظاہر کیا ہے۔ ٹکیت نے یہ سوال بھی پوچھا کہ آیا ترنگا صرف وزیر اعظم کا ہے؟

راکیش ٹکیت نے کہا کہ پورا ملک ترنگے سے پیار کرتا ہے، جس نے ترنگے کی توہین کی ہے اسے گرفتار کیا جائے۔ زرعی قوانین پر حکومت اور کسانوں کے مابین بات چیت کا پھر سے آغاز کرنے کے سوال پر راکیش ٹکیت نے کہا کہ بندوق کی نوک پر کوئی بات چیت نہیں ہوگی۔

خیال رہے کہ اتوار کو ’من کی بات‘ پروگرام میں وزیر اعظم مودی نے کہا کہ رواں ماہ 26 جنوری کو لال قلعہ پر ترنگے کی توہین کی گئی جسے دیکھ کر ملک بہت غمزدہ ہوا۔ 26 جنوری کو کسانوں کی ٹریکٹر پریڈ کے دوران کچھ شرپسندوں نے لال قلعہ پر سکھوں کی مذہبی علامت ’نشان صاحب‘ کا پرچم اس جگہ پر لہرایا جہاں وزیر اعظم ہر سال یوم آزادی پر جھنڈا لہراتے ہیں۔

اس کے جواب میں بھارتیہ کسان یونین کے ترجمان راکیش ٹکیت نے پوچھا کہ کیا ترنگا صرف وزیر اعظم کا ہے؟ پورا ملک ترنگے سے پیار کرتا ہے، جس نے ترنگے کی توہین کی ہے پولیس اس کو گرفتار کرے۔ راکیش ٹکیت نے کہا کہ وہ ملک کے وزیر اعظم کا احترام کرتے ہیں اور اس مسئلے کا حل بھی نکالا جانا چاہیے لیکن گن پوائنٹ پر بات چیت نہیں ہوگی، دباؤ میں آکر سمجھوتہ نہں کیا جائے گا۔ ہم بات چیت کریں گے لیکن حکومت ہم پر بات چیت کی کوئی شرط عائد نہ کرے۔

وزیر اعظم نریندر مودی نے ہفتے کے روز ہونے والی آل جماعتی اجلاس کے دوران یہ بھی کہا تھا کہ وزیر زراعت نریندر سنگھ تومر نے بات چیت کی پیش کش کی ہے وہ ابھی بھی برقرار ہے۔ پی ایم مودی نے کہا کہ حکومت کسانوں کی کال پر ان سے بات کرنے کے لئے تیار ہیں۔