شیئر مارکیٹ کی قدآور شخصیت اور ملک کی سب سے نئی ایئرلائنز ’اکاسا ایئر’ کے بانی راکیش جھنجھنوالا کا انتقال

ممبئی: اسٹاک مارکیٹ کی قدآور شخصیت راکیش جھنجھنوالا کا اتوار کے روز 62 سال کی عمر میں انتقال ہو گیا۔ جھنجھنوالا کو 2-3 ہفتے قبل ہی اسپتال سے ڈسچارج کیا گیا تھا، اتوار کو علی الصبح ان کی طبیعت اچانک خراب ہو گئی جس کے بعد انہیں اسپتال لے جایا گیا، جہاں انہیں مردہ قرار دے دیا گیا۔ بریچ کینڈی اسپتال نے صبح 6.45 پر تجربہ کار تاجر جھنجھنوالا کی موت کی تصدیق کی ہے۔

راکیش جھنجھنوالا کو ہندوستان میں شیئر مارکٹ کی معروف شخصیت تھے۔ اسٹاک مارکیٹ سے پیسہ کمانے کے بعد ان کی کمپنی ’بگ بل‘ نے ہوابازی کے شعبے میں بھی قدم رکھا ہے۔ انہوں نے اکاسا ایئر کے نام سے ایئر لائنز شروع کی ہے، جس نے 7 اگست کو ہی پروازوں کی شروعات کی ہے۔

اکاسا ایئر شیئر میں سب سے زیادہ حصہ داری راکیش جھنجھنوالا اور ان کی اہلیہ ریکھا کے پاس ہے۔ دنوں کے اس ایئر لائن کمپنی میں کل حصص 45.97 فیصد ہیں۔ اکاسا ایئر نے 13 اگست سے اپنی بنگلور-کوچی سروس شروع کی ہے۔ ساتھ ہی یہ 19 اگست سے بنگلور-ممبئی اور 15 ستمبر سے چنئی-ممبئی کے لیے اپنی سروس شروع کرے گی۔

راکیش جھنجھنوالا کی آمدنی کا بنیادی ذریعہ اسٹاک مارکیٹ ہے۔ جس وقت عام سرمایہ کار اسٹاک مارکیٹ میں پیسے کھو رہے ہوتے تھے، جھنجھنوالا اس وقت بھی کمائی کرنے میں کامیاب رہتے تھے۔ یہی وجہ ہے کہ وہ ہزاروں کروڑ کے اثاثوں کے مالک تھے۔ دلچسپ بات یہ ہے کہ اتنی دولت بنانے والے شخص نے کبھی محض 5 ہزار روپے سے کاروبار شروع کیا تھا۔