راجیہ سبھا: گاندھی خاندان کی جان کو خطرہ، ایس پی جی سیکورٹی بحال کی جائے، کانگریس

نئی دہلی: کانگریس نے گاندھی خاندان کے ارکان اور سابق وزیر اعظم منموہن سنگھ کی ایس پی جی سیکورٹی ہٹائے جانے کا معاملہ راجیہ سبھا میں اٹھاتے ہوئے کہا کہ ان کی جان کے خطرے کو دیکھتے ہوئے ان کی ایس پی جی سیکورٹی بحال کی جانی چاہیے۔

ایوان میں کانگریس کے ڈپٹی لیڈر آنند شرما نے بدھ کو وقفہ صفر کے دوران یہ معاملہ اٹھاتے ہوئے کہا کہ حکومت نے سابق وزیر اعظم منموہن سنگھ، کانگریس صدر سونیا گاندھی، ان کے صاحبزادے اور رکن پارلیمنٹ راہل گاندھی اور کانگریس جنرل سکریٹری پرینکا گاندھی واڈرا کو ملی ایس پی جی سیکورٹی ہٹا لی ہے۔ خیال رہے ڈاکٹر منموہن سنگھ 10 سال تک ملک کے وزیر اعظم رہے ہیں۔

انہوں نے کہا کہ سونیا گاندھی سابق وزیر اعظم اندرا گاندھی کی بہو اور سابق وزیر اعظم راجیو گاندھی کی اہلیہ ہیں۔ اندرا گاندھی اور راجیو گاندھی دونوں کا ہی قتل کردیا گیا تھا۔ لہذا گاندھی خاندان کے ارکان کی جان اب بھی خطرہ میں ہے۔ انہوں نے کہا کہ متحدہ ترقی پسند اتحاد حکومت کے دور میں اٹل بہاری واجپئی سمیت کسی بھی سابق وزیر اعظم کی ایس پی جی سیکورٹی نہیں ہٹائی گئی۔ انہوں نے کہا کہ یہ اہم عہدوں پر رہنے والے افراد کی سیکورٹی سے منسلک معاملہ ہے اور اسے سیاست سے باہر رکھا جانا چاہیے۔

انہوں نے کہا کہ وہ حکومت سے درخواست کر رہے ہیں کہ ان رہنماؤں کی ایس پی جی سیکورٹی فوری طور پر بحال کی جانی چاہیے ورنہ تو اس سے حکومت کی نیت پر سوال کھڑے ہوں گے۔ ایوان میں موجود بھارتیہ جنتا پارٹی کے کارگزار صدر جے پی نڈا نے کہا کہ اس میں کوئی سیاست نہیں ہے اور کسی بھی لیڈر کی سیکورٹی ہٹائی نہیں گئی ہے۔ یہ دوسری سیکورٹی ایجنسی کو سونپی گئی ہے۔ وزارت داخلہ کی کسی شخص کو سیکورٹی مہیا کرانے کا اپنا نظام اور پروٹوکول ہے جس کی بنیاد پر فیصلہ کیا جاتا ہے، انہوں نے کہا کہ یہ فیصلہ کسی پارٹی کی بنیاد پر نہیں لیا گیا ہے۔

بی جے پی کے ہی سبرامنیم سوامی نے کہا کہ ایس پی جی سیکورٹی کے بارے میں فیصلہ وزارت داخلہ کی خصوصی کمیٹی لیتی ہے اور یہ کوئی استحقاق نہیں ہے۔ انہوں نے کہا کہ راجیو گاندھی کے ایل ٹی ٹی ای کی جانب سے قتل کے پیش نظر ایس پی جی سیکورٹی دینے کا فیصلہ کیا گیا تھا لیکن اب ایل ٹی ٹی ای ہی ختم ہو گئی ہے۔ انہوں نے کہا کہ سونیا گاندھی نے خود کہا تھا کہ راجیو گاندھی کے قاتلوں کو پھانسی کی سزا نہیں دی جانی چاہیے۔ کانگریس ارکان نے ان کی اس بات پر اعتراض کیا۔ اس دوران راجیہ سبھا کے چیئرمین ایم وینکیا نائیڈو نے کہا کہ وہ خود بھی کسی مجرم کی سزا کو کم کرنے کے حق میں نہیں۔