بھاگوت جی! آپ کو شرم آنی چاہیے: راہل گاندھی

کانگریس سربراہ راہل گاندھی نے آر ایس ایس سربراہ کے فوج سے متعلق دیے گئے بیان پر ٹوئٹ کے ذریعہ اپنی ناراضگی ظاہر کی ہے۔ انھوں نے ٹوئٹ میں لکھا ہے کہ ’’آر ایس ایس سربراہ کی تقریر ہر ہندوستانی کی بے عزتی ہے کیونکہ اس سے ہر اس ہندوستانی کا وقار مجروح ہوا ہے جس نے ملک کے لیے اپنی جان قربان کی ہے۔ یہ ہمارے قومی پرچم کی بھی بے عزتی ہے کیونکہ یہ اس ہر فوجی اور جوان کی بے عزتی ہے جس نے اسے سلامی دی ہے۔ ہمارے شہیدوں اور ہماری فوج کی بے عزتی کرنے کے لیے بھاگوت جی آپ کو شرم آنی چاہیے۔‘‘

واضح رہے کہ بہار کے مظفر پور میں آر ایس ایس کی ایک تقریب میں آر ایس ایس سربراہ موہن بھاگوت نے کہا کہ ’’اگر ضرورت پڑی تو ملک کے لیے لڑنے کی خاطر آر ایس ایس کے پاس تین دن کے اندر ’فوج‘ تیار کرنے کی صلاحیت ہے۔‘‘ انھوں نے مظفر پور کے ضلع اسکول میدان میں آر ایس ایس کے سویم سیوکوں کو خطاب کرتے ہوئے کہا کہ ’’فوجیوں کو تیار کرنے میں فوج کو چھ سے سات مہینے لگ جائیں گے، لیکن آر ایس ایس کے سویم سیوک تین دن میں یہ تیاری کر لیں گے۔‘‘