بی جے پی باپو کا چشمہ ادھار لیتی ہے، انہیں اپنا نہیں سکتی: راہل گاندھی

مہاراشٹر کے وردھا واقع سیواگرام میں کانگریس کی ورکنگ کمیٹی کا اجلاس منعقد ہوا۔ اجلاس کے دوران کئی اہم ایشوز پر غور و خوض کیا گیا۔ اجلاس کے دوران راہل گاندھی نے کہا، ’’دو طرح کے نظریات کے گاندھی جینتی منا رہے ہیں ایک کانگریس ہے جس کے دل میں گاندھی ہے اور دوسری جانب گوڈسے کا نظریہ ہے جو سیاسی فائدہ کے لئے گاندھی کے سامنے جھکتا ہے، لیکن ان کا یہ حربہ صرف اور صرف ووٹ پانے کے لئے ہے۔‘‘

بی جے پی پر بھی حملہ کرتے ہوئے راہل گاندھی نے کہا کہ بی جے پی اشتہار کے لئے باپو کا چشمہ ادھار تو لے سکتی ہے لیکن انہیں اپنا نہیں سکتی۔

مہاراشٹر کے وردھا میں کانگریس ورکنگ کمیٹی کی میٹنگ کے بعد کانگریس کے صدر راہل گاندھی نے ایک جلسہ عام کے خطاب کیا۔ جلسہ میں بڑی تعداد میں لوگ شامل ہوئے۔ اس دوران لوگوں نے مودی حکومت کے غصہ کا اظہار کیا اور ’چوکیدار ہی چور ہے‘ کے نعرے لگائے۔

ادھر، راہل گاندھی نے جلسہ عام سے خطاب کرتے ہوئے کہا کہ ملک میں کئی گھوٹالہ سامنے آ چکے ہیں اور ان گھوٹالوں میں چوکیدار ہی بھاگیدار (شراکتدار) ہے۔ کانگریس کے صدر نے کہا، ’’وزیر اعظم نریندر مودی نے 30 ہزار کروڑ روپے انل امبانی کی جیب میں ڈال دئے۔ ایچ اے ایل گزشتہ 70 سالوں سے جہاز تخلیق کر رہی ہے پھر بھی رافیل سودا انل امبانی کی کمپنی کو دیا گیا۔‘‘

مہاراشٹر کے وردھا میں کانگریس ورکنگ کمیٹی (سی ڈبلیو سی) کی میٹنگ ختم ہو گئی ہے۔ کانگریس کے ترجمان سرجے والا نے میٹنگ کے بعد صحافیوں سے خطاب کرتے ہوئے کہا کہ بی جے پی اور آر ایس ایس مہاتما گاندھی کو اپنانے کا ڈھونگ کر رہی ہیں۔ انہوں نے کہا، ’’سی ڈبلیو سی میں دو قرارداد منظور ہوئیں۔ پہلی گاندھی کا نظریہ اور دوسری گاندھی کے خیالات۔ ان دونوں کو اپنی زندگی میں اتارنے کا فیصلہ لیا گیا ہے۔ سی ڈبلیو سی کا خیال ہے کہ آر ایس ایس نے باپو کے خیالات کے الٹ کام کیا ہے۔‘‘

مہاراشٹر کے سیواگرام میں کانگریس سی ڈبلیو سی کی میٹنگ شروع ہو چکی ہے۔ میٹنگ میں کانگریس کے صدر راہل گاندھی، یو پی اے کی چیئرپرسن سونیا گاندھی اور سابق وزیر اعظم منموہن سنگھ سمیت کانگریس ورکنگ کمیٹی کے دیگر ارکان موجود ہیں۔

گاندھی جی کے نقش قدم پر چلتے ہوئے ’بھارت چھوڑو‘ تحریک کے 75 سال بعد کانگریس صدر راہل گاندھی نے بی جے پی کے خلاف سیواگرام سے ’بی جے پی اقتدار چھوڑو‘ تحریک شروع کر دی ہے۔

قبل ازیں، کانگریس کے صدر راہل گاندھی، یو پی اے چیئر پرسن سونیا گاندھی اور سابق وزیر اعظم منموہن سنگھ سمیت دیگر کانگریس مجلس عاملہ کے ارکان مہارشٹر کے وردھا پہنچ گئے ہیں۔ سیواگرام میں راہل گاندھی نے دیگر کانگریس رہنماؤں کے ہمراہ مہاتما گاندھی کو خراج عقیدت پیش کی اس کے بعد ایک دعائیہ نششت کا انعقاد کیا گیا۔

واضح رہے، 1942 میں مہاتما گاندھی نے انگریزوں کے خلاف اپنی سب سے فیصلہ کن سیاسی تحریک ’بھارت چھوڑو‘ ممبئی کے گوالیا ٹینک میدان سے شروع کی تھی۔ ہندوستان میں برطانوی حکومت کو ختم کرنے کا مطالبہ کرتے ہوئے انہوں نے اس صورت حال کو کانگریس کے لیے ’کرو یا مرو‘ کا نام دیا تھا۔