لندن کی کیمبرج یونیورسٹی میں راہل گاندھی کا بیان، ’بی جے پی نے ہر جگہ کیروسین چھڑک دیا ہے‘

نئی دہلی: کانگریس لیڈر راہل گاندھی ’آئیڈیاز فار انڈیا‘ کانفرنس میں شرکت کے لیے لندن کی کیمبرج یونیورسٹی پہنچے ہیں۔ جمعہ کے روز انہوں نے بی جے پی پر شدید حملہ بولا۔ راہل گاندھی نے کہا کہ کانگریس پہلے پہلے جیسا ہندوستان حاصل کرنا چاہتی ہے اور اس کے لیے جدوجہد کر رہی ہے۔ جبکہ بی جے پی پارٹی اور اس کے لیڈران کی آواز کو دبانے کی کوشش کر رہی ہے۔ راہل نے چین کے حوالہ سے بھی مرکزی حکومت پر تنقید کی۔

راہل نے اپنے بیان میں کہا ’’ہماری پارٹی پہلے جیسا ہندوستان حاصل کرنے کی کوشش کر رہی ہے۔ بی جے پی عوام کی آواز کو دباتی ہے، جبکہ ہم عوام کی آواز سننے کا کام کر رہے ہیں۔ ہندوستان دیکھ رہا ہے کہ ان اداروں پر حملے ہو رہے ہیں جنہوں نے ملک تعمیر کیا، ان پر اب ’ڈیپ اسٹیٹ‘ کا قبضہ ہے۔‘‘

دہلی کی کیمبرج یونیورسٹی میں ہونے والی اس کانفرنس میں راہل گاندھی کے علاوہ سیتارام یچوری، سلمان خورشید، تیجسوی یادو، مہوا موئترا اور منوج جھا سمیت حزب اختلاف کے متعدد لیڈران بھی شریک ہوئے۔

راہل نے کہا کہ یہ ایک نظریاتی جنگ ہے، ایک قومی نظریاتی جنگ۔ بی جے پی اور سنگھ ہندوستان کو ایک جغرافیہ کے طور پر دیکھتے ہیں لیکن کانگریس کے لیے ہندوستان لوگوں سے بنتا ہے۔ تاہم، انہوں نے یہ بھی اعتراف کیا کہ کانگریس اندرونی کشمکش، بغاوت، انحراف اور انتخابات میں شکست سے نبردآزما ہے۔

راہل نے کہا کہ بی جے پی حکومت میں روزگار میں کمی آئی ہے، اس کے باوجود یہ پولرائزیشن کی وجہ سے اقتدار میں ہے۔ آج ہندوستان کی حالت اچھی نہیں ہے۔ بی جے پی نے چاروں طرف ’کیروسین‘ چھڑک رکھا ہے۔ انہوں نے کہا کہ ’’ہم کہہ رہے ہیں ہمارے پاس ایک ایسا ہندوستان ہے جہاں مختلف خیالات کا اظہار کیا جا سکتا ہے اور ہم چیت کر سکتے ہیں۔‘‘

راہل گاندھی سے جب جمہوریت کے بارے میں سوال پوچھا گیا تو انہوں نے کہا کہ اب ہر ادارے پر حکومت کا قبضہ ہو چکا ہے۔ ہر ادارے پر حملہ ہو رہا ہے۔ ہم سب کی آواز سنتے ہیں۔ ہم لوگوں کی بات سننے کے لیے موجود ہیں۔ لیکن بی جے پی آواز کو دبا رہی ہے۔

امریکہ کی جانب سے ہندوستان میں انسانی حقوق کی خلاف ورزیوں کے واقعات کو اٹھانے کے بارے میں راہل گاندھی نے کہا کہ ہمیں یہ بتانے کی ضرورت نہیں ہے کہ ہندوستان میں پولرائزیشن ہے۔ ہم پولرائزیشن سے لڑ رہے ہیں۔ کانگریس سمیت اپوزیشن بھی یہی لڑائی لڑ رہی ہے۔