راہل گاندھی نے وائناڈ میں کسان کی خودکشی پر وَزیر اعلیٰ وجین کو لکھا خط، معاشی مدد کا مطالبہ

کانگریس صدر راہل گاندھی آئندہ ہفتہ اپنے پارلیمانی حلقہ کیرالہ کے وائناڈ جانے والے ہیں اور اس سے پہلے جمعہ کو انھوں نے وزیر اعلیٰ پینارائی وجین کو خط لکھ کر خودکشی کرنے والے ایک کسان کی فیملی کو معاشی مدد مہیا کرانے کی گزارش کی۔ کسان نے مبینہ طور پر قرض نہ ادا کر پانے کے سبب خودکشی کی۔ وائناڈ لوک سبھا سیٹ جیتنے والے کانگریس صدر نے ریاستی حکومت سے اس واقعہ کی جانچ کرانے کے لیے بھی کہا۔

راہل گاندھی نے اپنے خط میں پینارائی وجین کو لکھا ہے کہ ’’وائناڈ علاقہ کی پناماران پنچایت کے نیرورم گاؤں میں کسان وی ڈی دنیش کمار کی خودکشی کے بارے میں جان کر میں غمزدہ ہوں۔‘‘ کہا جا رہا ہے کہ کسان نے قرض ادا نہ کر پانے کے سبب اپنی جان کی قربانی دے دی۔

وائناڈ سے نومنتخب رکن پارلیمنٹ راہل گاندھی نے کسان کی بیوی سے فون پر بات بھی کی اور اس کے بعد ہی وزیر اعلیٰ کو خط لکھا۔ خط میں راہل لکھتے ہیں کہ ’’مجھے پتہ چلا کہ خاتون کا شوہر قرض ادا کرنے میں اہل نہیں تھا جس کی وجہ سے وہ زبردست تناؤ میں تھا۔ تناؤ نے اسے خودکشی کی طرف ڈھکیل دیا۔‘‘ قابل ذکر ہے کہ کیرالہ پولس دنیش کمار کی موت کی وجہ زہریلی اشیا کھا لینا بتائی ہے۔

راہل گاندھی نے پینارائی وجین کو لکھے تفصیلی خط میں یہ بھی لکھا کہ ’’کمار کا معاملہ کوئی واحد معاملہ نہیں ہے۔ وائناڈ میں کسانوں کی خودکشی کا سیلاب آیا ہوا ہے۔ پریشان کرنے والی بات یہ ہے کہ کیرالہ حکومت جب قرض ادا کرنے کا دباؤ ڈالنے پر پابندی کا اعلان 31 دسمبر تک کے لے کر چکی ہے، تب بھی قرض وصولی ایجنٹوں کے ذریعہ کسانوں پر دباؤ ڈالا جا رہا ہے، ان کا پیچھا کیا جا رہا ہے۔‘‘

راہل گاندھی نے خط میں آگے لکھا ہے کہ ’’میں کیرالہ کے کسانوں کے اس سنگین مسئلہ کے ٹھوس، طویل مدتی حل تلاش کرنے میں پوری مدد اور تعاون کرنے کی پیشکش کرتا ہوں اور یقینی بنانا چاہتا ہوں کہ کیرالہ میں رہ رہا ہر کسان اپنی زندگی عزت کے ساتھ جیے۔‘‘

کیرالہ کے وزیر اعلیٰ پینارائی وجین نے راہل گاندھی کے خط کا جواب دیتے ہوئے کہا کہ ’’میں نے ضلع مجسٹریٹ سے معاملے کی جانچ کر کے حکومت کے پاس ایک تفصیلی رپورٹ جمع کرنے کے لیے کہا ہے تاکہ آگے کی کارروائی کی جا سکے۔ رپورٹ آنے کے بعد معاشی مدد دینے پر بھی غور کیا جائے گا۔

واضح رہے کہ راہل گاندھی کو ائناڈ سیٹ پر 431770 ووٹوں کے ریکارڈ فرق سے جیت ملی ہے۔ کانگریس سربراہ نے اپنے نزدیکی حریف سی پی آئی ایم لیڈر پی پی سنیر کو شکست دیا۔ سنیر کو 274597 ووٹ ملے جب کہ راہل گاندھی کو کل 706367 ووٹ ملے۔ راہل گاندھی وائناڈ کے ووٹروں کا شکریہ ادا کرنے 7 جون کو وائناڈ جائیں گے اور 8 جون کو بھی وہ وائناڈ میں کافی وقت گزاریں گے۔