زرعی قوانین: راہل گاندھی ’2 کروڑ دستخط‘ کے ساتھ صدر جمہوریہ سے ملاقات کرنے کے لئے نکلے

زرعی قوانین کے خلاف مودی حکومت پر لگاتار دباؤ بڑھ رہا ہے، اور کانگریس پارٹی کسانوں کے حق میں لگاتار زور و شور سے آواز بلند کر رہی ہے۔ اسی ضمن میں آج کانگریس کے سابق صدر راہل گاندھی کی قیادت میں پارٹی کے ایک نمائندہ وفد نے صدر جمہوریۂ ہند رام ناتھ کووند سے ملاقات کرنے کے لئے نکل چکے ہی۔ اس ملاقات کے دوران کانگریس لیڈران زرعی قوانین کے خلاف ملک بھر سے جمع کیے گئے 2 کروڑ لوگوں کے دستخط والے دستاویزات صدرجمہوریہ کووند کو سونپیں گے۔

کانگریس جنرل سکریٹری کے سی وینوگوپال نے اس سلسلے میں 23 دسمبر کو تفصیلی جانکاری دی اور بتایا کہ کانگریس نے ستمبر میں زرعی قوانین کو واپس لینے کی حمایت میں دستخط مہم چلائی تھی۔ اس مہم میں ملک بھر سے لوگوں نے زرعی قوانین کے خلاف اپنے دستخط کیے ہیں۔ ملک بھر سے آئے ان دستخط کو جمع کیا گیا ہے جسے 24 دسمبر کو راہل گاندھی کی قیادت میں کانگریس لیڈروں کا وفد صدر جمہوریہ کے حوالے کرے گا اور زرعی قوانین کو منسوخ کرنے کا مطالبہ کرے گا۔

وینوگوپال نے اپنی بات کو آگے بڑھاتے ہوئے یہ بھی کہا کہ زرعی قوانین کے خلاف تقریباً 2 کروڑ لوگوں نے دستخط کرتے ہوئے مطالبہ کیا ہے کہ ان قوانین کو واپس لینے کے لیے صدر جمہوریہ کو مداخلت کرنی چاہیے۔ کے سی وینوگوپال نے مزید کہا کہ اناپرست مودی حکومت نے شروع سے ہی کسانوں کے ساتھ دھوکہ کیا ہے، اور اب یہ صاف ہو گیا ہے کہ بی جے پی کسانوں اور مزدوروں کی جگہ بڑے سرمایہ داروں کے فائدے کے لیے کام کر رہی ہے۔ کانگریس جنرل سکریٹری نے مودی حکومت پر مظاہرین کسانوں کو بدنام کرنے کا الزام بھی عائد کیا۔