راہل گاندھی نے پارلیمنٹ میں اٹھایا نیٹ کا مسئلہ، کہا- ’ملک کے طلبا کو مشترکہ پیغام دینا چاہتے ہیں‘

نئی دہلی: پارلیمنٹ اجلاس کے پانچویں دن کی کارروائی ہنگامہ کے ساتھ شروع ہوئی۔ دونوں ایوانوں لوک سبھا اور راجیہ سبھا میں نیٹ کے مسئلہ پر اپوزیشن کے ارکان پارلیمنٹ نے ہنگامہ کیا اور نعرے بازی کی۔ لوک سبھا میں قائد حزب اختلاف راہل گاندھی نے پارلیمنٹ میں نیٹ پیپر لیک کا معاملہ اٹھایا۔ جب انہوں اس معاملہ پر بحث کا مطالبہ کیا، تو اسپیکر اوم برلا نے کہا کہ آپ اس معاملہ کو صدر کے خطاب پر بحث کے دوران اٹھا سکتے ہیں۔ راہل گاندھی صدر کے خلاف پر بحث سے قبل ہی نیٹ پیپر لیک معاملہ پر بحث کا مطالبہ کر رہے تھے۔

جب لوک سبھا کی کارروائی شروع ہوئی تو اسپیکر اوم برلا نے ایوان کے 13 سابق ارکان کی موت کی اطلاع دی۔ ایوان میں سابق ارکان کے انتقال پر خاموشی اختیار کرتے ہوئے تعزیت کا اظہار کیا گیا۔ اس کے بعد سپیکر نے ارکان سے کہا کہ وہ اپنے ناموں کے سامنے نشان زد فارم ایوان کی میز پر رکھیں۔ تبھی اپوزیشن لیڈر راہل گاندھی نے نیٹ کا مسئلہ اٹھایا اور اس پر بحث کا مطالبہ کیا۔ راہل گاندھی کے مطالبے پر اسپیکر اوم برلا نے کہا کہ آپ صدر کے خطاب پر کسی بھی موضوع پر تفصیل سے بات کر سکتے ہیں اور مجھے توقع ہے کہ حکومت جواب دے گی۔

راہل گاندھی نے اسپیکر سے دو منٹ کا وقت مانگا۔ اس پر اسپیکر نے کہا کہ آپ صرف دو منٹ نہیں اپنی پارٹی کا پورا وقت نکال سکتے ہیں۔ آپ تفصیل سے بتائیں۔ اسپیکر اوم برلا نے کہا کہ آپ اپوزیشن لیڈر ہیں، پارلیمانی ڈیکورم پر عمل کریں۔ اس کے بعد راہل گاندھی نے کچھ کہا جس پر اسپیکر اوم برلا نے کہا کہ میں مائیک بند نہیں کرتا، یہاں کوئی بٹن نہیں ہے۔ لوک سبھا میں قائد حزب اختلاف راہل گاندھی نے کہا کہ وہ ہندوستان کے طلبا کو مشترکہ پیغام دینا چاہتے ہیں۔

ان کا مزید کہنا تھا کہ اسی لیے ہم نے سوچا کہ طلبہ کے اس مسئلے پر تفصیلی گفتگو کی جائے۔ اس کے بعد اپوزیشن ارکان نے ہنگامہ آرائی اور نعرے بازی شروع کر دی۔ ہنگامہ آرائی کے درمیان اسپیکر اوم برلا نے ایوان کی کارروائی دوپہر 12 بجے تک ملتوی کر دی۔ قابل ذکر ہے کہ ایک دن پہلے کانگریس صدر اور راجیہ سبھا میں اپوزیشن لیڈر ملکارجن کھڑگے کی رہائش گاہر پر ہوئی میٹنگ میں انڈیا بلاک کی جماعتوں نے نیٹ پیپر لیک کے معاملے کو پارلیمنٹ میں اٹھانے کا فیصلہ کیا تھا۔ پارلیمنٹ کی کارروائی شروع ہونے سے پہلے ہی راہل گاندھی نے کہا تھا کہ وہ اس مسئلہ کو اٹھائیں گے۔

راہل گاندھی نے کہا تھا کہ نیٹ پر پارلیمنٹ میں بحث ہونی چاہئے۔ انہوں نے کہا کہ یہ نوجوانوں سے جڑا مسئلہ ہے، پہلے اس پر بات ہونی چاہیے۔ پہلے پیپر لیک پر بحث ہونی چاہیے۔ راہل گاندھی نے کہا کہ کل تمام اپوزیشن جماعتوں کے لیڈروں کی میٹنگ ہوئی جس میں اتفاق رائے ہوا کہ آج ہمیں نیٹ کے موضوع پر بات کرنے کی ضرورت ہے۔ انہوں نے کہا، ’’میں وزیر اعظم سے درخواست کرتا ہوں کہ یہ نوجوانوں کا مسئلہ ہے اور اس پر پہلے بات ہونی چاہئے۔‘‘ خیال رہے کہ نیٹ پیپر لیک پر اپوزیشن نے جارحانہ رخ اختیار کیا ہوا ہے اور حکومت تنقید کی زد میں ہے۔