راہل گاندھی اور پرینکا گاندھی نے دہلی میں قلیوں سے کی ملاقات، مدد کا یقین دلایا

نئی دہلی: کانگریس قائدین راہل گاندھی اور پرینکا گاندھی واڈرا نے پیر کو قومی دارالحکومت دہلی میں ریلوے اسٹیشن پر سامان ڈھونے والے قلیوں سے ملاقات کی۔ انہوں نے قلیوں کے مسائل تفصیل سے سنے اور یقین دلایا کہ وہ ان کے مسائل کو اعلیٰ سطح پر اٹھائیں گے اور انہیں حل کرائیں گے۔ راہل گاندھی کی یقین دہانی کے بعد قلیوں کے چہروں پر امید کی جھلک نظر آئی۔ قلیوں نے کانگریس لیڈر سے روزگار کے مناسب مواقع فراہم کرانے کا بھی مطالبہ کیا۔

قلیوں کا کہنا تھا کہ 2007 میں اس وقت کے ریلوے کے وزیر لالو پرساد یادو کی وجہ سے انہیں ’گروپ ڈی‘ کیٹیگری میں شامل کیا گیا تھا، جس کی وجہ سے انہیں کچھ کام مل پا رہا تھا لیکن اب ان کی حالت زار انتہا کو پہنچ چکی ہے۔ انہوں نے کہا، ’’ہمارے پاس کوئی کام نہیں ہے۔ ہماری روزی روٹی کو براہ راست خطرہ ہے۔ یہاں تک کہ 2 وقت کے کھانے کا انتظام کرنا بھی مشکل ہو گیا ہے۔‘‘

قلی محمد کریم اکرانی نے راہل گاندھی سے کہا، ’’ہم تمام قلی بھائی آپ کے پاس بڑی امیدوں کے ساتھ آئے ہیں۔ 2008 میں لالو پرساد یادو نے جب وہ ریلوے کے وزیر تھے تو ہمیں گروپ ڈی کیٹیگری میں شامل کیا تھا، جس کی وجہ سے ہمارا گھر چل رہا تھا لیکن آج ہماری بدقسمتی دیکھیں کہ ہمارے پاس کوئی کام نہیں ہے۔ ہماری حالت ابتر ہو گئی ہے۔ امید ہے کہ آپ ہمارے مسائل کو اعلیٰ سطح پر اٹھائیں گے اور ہمیں روزگار کے مناسب مواقع فراہم کرائیں گے۔‘‘

کریم اکرانی نے مزید کہا، ’’اسٹیشنوں پر ہمارا کام اب ختم ہو گیا ہے۔ مودی حکومت کی طرف سے اسٹیشن پر پرائیویٹ بیٹری کاریں چلائی جا رہی ہیں، اس کا براہ راست اثر ہماری روزی روٹی پر پڑ رہا ہے۔ ہماری زندگی مشکل ہو گئی ہے۔ ہمیں امید ہے کہ آپ ہمارا مطالبہ اٹھائیں گے اور ہمارا مسئلہ حل کرائیں گے۔‘‘