رافیل معاملہ: سپریم کورٹ کا نئی عرضی پر سماعت کرنے سے انکار

نئی دہلی: سپریم کورٹ نے ایک فرانسیسی پورٹل کے ذریعہ کئے گئے ‘نئے انکشافات‘ کی بنیاد پر 2016 کے رافیل جنگی طیارہ سودے کے معاملے کی جانچ کی درخواست کرنے والی نئی عرضی کو خارج کر دیا۔

چیف جسٹس یو یو للت اور جسٹس ایس رویندر بھٹ کی بنچ نے پپر کے روز عرضی پر سماعت کرنے سے انکار کرتے ہوئے کہا کہ تین ججوں کی بنچ کی طرف سے اسی طرح کی درخواستوں کو خارج کرنے کے سابقہ ​​فیصلے کے پیش نظر اس معاملے کو فوری طور پر سماعت کے لیے قبول نہیں کیا جا سکتا۔

وکیل ایم ایل شرما کی طرف سے دائر تازہ درخواست میں کہا گیا کہ رافیل جنگی طیارہ بنانے والی کمپنی ڈسالٹ ایوی ایشن نے یہاں کے دلال لوگوں کو تقریباً 10 لاکھ یورو ادا کیے تھے۔ انہوں نے عرضی میں کہا کہ فرانس کے ایک پورٹل نے اس حوالے سے نئے انکشافات کیے ہیں۔

ایڈوکیٹ شرما نے بنچ کے سامنے بار بار التجا کی کہ رشوت کی ادائیگی کی پختہ اطلاعات ہیں اور سی بی آئی اور ای ڈی سے اس کی تحقیقات کے لیے کہا جا سکتا ہے، تاہم ان کی عرضی مسترد کر دی گئی۔