بابا فرید یونیورسٹی کے وائس چانسلر نے دیا استعفیٰ، مان حکومت پر بے عزتی کا الزام

پنجاب کی عآپ حکومت کے ایک وزیر نے بابا فرید یونیورسٹی آف ہیلتھ سائنسز کے وائس چانسلر راج بہادر کی بے عزتی کر دی جس سے مایوس ہو کر ہفتہ کے روز انھوں نے بھگونت مان حکومت کو اپنا استعفیٰ بھیج دیا۔ راج بہادر نے جمعہ کو فرید کوٹ میں گرو گووند سنگھ میڈیکل کالج اور اسپتال کے دورے کے دوران وزیر صحت چیتن سنگھ جورا ماجرا کے ذریعہ بے عزتی کا حوالہ دیتے ہوئے استعفیٰ دے دیا۔

واضح رہے کہ بھگونت مان حکومت میں نوتقرر وزیر اس وقت تنازعہ میں پھنس گئے جب انھوں نے راج بہادر کو دورے کے دوران ایک مریض کے ’گندے‘ بستر پر لیٹنے کے لیے کہا۔ وزیر کی ایک ویڈیو سوشل میڈیا پر وائرل ہو گئی ہے جس میں وہ وائس چانسلر کو جبراً بستر پر لیٹنے کے لیے کہہ رہے ہیں۔ وزیر کو میڈیکل کالج میں صاف صفائی کی کمی پر وائس چانسلر کے ساتھ ’بدسلوکی‘ کرتے ہوئے دیکھا جا سکتا ہے۔ انڈین آرتھو ایسو سی ایشن نے واقعہ کی مذمت کی ہے۔ بہر حال، اس معاملے کے بعد وائس چانسلر کے سکریٹری او پی چودھری نے بھی اپنا استعفیٰ سونپ دیا ہے۔