کورونا معاملے میں پنجاب کے حالات دیگر ریاستوں سے بہتر:سدھو

پنجاب کے صحت و خاندانی بہبود کےوزیر بلبیر سنگھ سدھو نے کہا ہے کہ حکومت پنجاب دیگر ریاستوں کے مقابلے کورونا کو پھیلنے سے روکنے میں ایک حد تک کامیاب رہی ہے جس کے سبب دوسری ریاستوں کے مقابلے پنجاب میں کم اموات ہوئیں ہیں۔

مسٹر سدھو نے آج یہاں کہا کہ ریاستی حکومت کے مختلف محکمات متحد ہوکر کورونا کے خلاف جنگ لڑ رہے ہیں جس کی وجہ سے ریاست میں انفیکشن کی شرح محض 3.10 فیصد ہے جو ملک میں سب سے کم ہے۔انہوں نے کہا کہ عالمی ادارہ صحت کے ذریعہ کورونا کے پھیلاؤکو ماپنے کے لیے متعین کیے گئے معیارات میں سے انفیکشن کی شرح سب سے اہم ہے۔

عآپ لیڈران کی جانب سے ریاستی حکومت کو دہلی ماڈل اپنانے کا سبق دینے کے بارے میں انہوں نے کہا کہ اپوزشن لیڈر ہرپال سنگھ چیما اپنی صلاح اپنے پاس ہی رکھیں کیونکہ پنجاب کی صورت حال دہلی کے مقابلے کافی بہترہے،عآپ لیڈران کو بیان دینے سے پہلے یہ پتہ کرلینا چاہیے کہ کیجریوال حکومت کے خراب مظاہرہ کے سبب ملک میں کورونا سے اب تک ہوئی اموات میں سے 10 فیصد یعنی 4082 اموات صرف دہلی میں ہوئی ہیں۔

انہوں نے کہا کہ پنجاب میں اموات کی تعداد 539 ہے جو ملک کی اموات کے اعداوشمار کے مطابق محض ایک فیصد ہی ہے۔ان میں سے بھی بیشتر دیگر بیماریوں والے مریض ہیں۔ریاست میں کورونا کو جلد شکست دینےکے لیے شروع کی گئی جنگ کو تیز کرنے کے لیے وزیراعلیٰ کیپٹن امریندر سنگھ کی ہدایات کے تحت محکمہ صحت ہزاروں کی تعداد میں میڈیکل اور پیرامیڈیکل اسٹاف کی بھرتی کرنے جارہا ہے۔