پنجاب: کانگریس کی اسٹار کیمپینروں کی فہرست جاری، سدھو کے ساتھ راہل، پرینکا کریں گے تشہیر، عمران پرتاپ گڑھی کا نام بھی شامل

نئی دہلی: پنجاب اسمبلی انتخابات کے پیش نظر کانگریس نے جمعہ کے روز اپنے 30 اسٹار کیمپینروں کی فہرست جاری کر دی۔ اس فہرست میں کانگریس صدر سونیا گاندھی، سابق وزیر اعظم منموہن سنگھ، پارٹی کے سابق صدر راہل گاندھی اور جنرل سکریٹری پرینکا گاندھی کے نام شامل ہیں۔

کانگریس پارٹی کے تنظیمی جنرل سکریٹری کے سی وینوگوپال نے فہرست کو جاری کر کے اسٹار کیمپینروں کے بارے میں اطلاع دی۔ اس فہرست میں اتراکھنڈ کے سابق وزیر اعلیٰ ہریش چودھری، پنجاب کے ریاستی صدر نوجوت سنگھ سدھو، پنجاب کانگریس کے صدر نوجوت سنگھ سدھو، اور وزیر اعلیٰ پنجاب چرنجیت سنگھ چنی کو بھی شامل کیا گیا ہے۔ اس کے علاوہ ہریانہ کے سابق وزیر اعلیٰ بھوپندر سنگھ ہڈا اور کانگریس کے سینئر لیڈڑ آنند شرما بھی پارٹی کے اسٹار کیمپینروں میں شامل ہیں۔

کانگریس کے اقلیتی شعبہ کے چیئرمین عمران پرتاپ گڑھی کو بھی پنجاب کے لئے پارٹی کے اہم مہم جوؤں میں شامل کیا گیا ہے۔ اس سے قبل گووا کی اسٹار کیمپینروں کی فہرست میں بھی عمران پرتاپ گڑھی کا نام شامل تھا۔

اس کے علاوہ کانگریس کی اسٹار کیمپینروں کی فہرست میں جنرل سکریٹری امبیکا سونی، لوک سبھا کی سابق اسپیکر میرا کمار، راجستھان کے وزیر اعلی اشوک گہلوت، چھتیس گڑھ کے وزیر اعلی بھوپیش بگھیل، سنیل جاکھڑی، پرتاپ سنگھ باجوہ، راجستھان انچارج اجے ماکن، کماری سیلجا، جنرل سکریٹری رندیپ سنگھ سرجے والا، راجیو شکلا، سچن پائلٹ، رونیت سنگھ بٹو، رکن پارلیمنٹ دیپیندر سنگھ ہڈا، رنجیت رنجن، مہیلا کانگریس صدر نیتا ڈیسوزا، یوتھ کانگریس کے صدر بی وی سرینواس،، امریندر سنگھ راجہ برار، امریتا دھون، رامندر اوالا، تیجندر سنگھ بٹو کو بھی شامل کیا گیا ہے۔

خیال رہے کہ کانگریس لیڈر راہل گاندھی 6 فروری کو پنجاب کے دورے پر ہوں گے۔ توقع ہے کہ اس دوران راہل پارٹی کے وزیر اعلیٰ کے چہرے کا اعلان کر سکتے ہیں۔ پنجاب میں اسمبلی انتخابات کے لیے پولنگ 20 فروری کو ہوگی اور نتائج کا اعلان 10 مارچ کو کیا جائے گا۔