پنجاب حکومت کی کابینہ توسیع، 5 اراکین اسمبلی نے وزارتی عہدہ کا لیا حلف

پنجاب کے وزیر اعلیٰ بھگونت مان نے پیر کو اپنی کابینہ کی پہلی توسیع کرتے ہوئے دوسری بار رکن اسمبلی منتخب ہوئے امن اروڑا سمیت 5 اراکین اسمبلی کو اپنی کابینہ میں شامل کیا۔ عام آدمی پارٹی (عآپ) کے اقتدار میں آنے کے چار ماہ سے بھی کم وقت میں یہ توسیع ہوئی ہے جس نے اسمبلی انتخابات میں 117 سیٹوں میں سے 92 سیٹیں جیت کر لوگوں کو حیران کر دیا تھا۔ گورنر بنواری لال پروہت نے وزیر اعلیٰ کی موجودگی میں پانچ نئے وزراء کو حلف دلایا۔ ان کے شامل ہونے سے وزیر اعلیٰ سمیت وزارتی کونسل میں تعداد بڑھ کر 15 ہو گئی ہے۔ یعنی اب بھی 8 عہدے خالی ہیں۔

سنام سے دوسری بار رکن اسمبلی بنے اور 75277 ووٹوں کے سب سے زیادہ فرق سے جیت حاصل کرنے والے اروڑا آج عہدہ اور رازداری کا حلف لینے والے پہلے شخص تھے۔ اس کے بعد پروٹیم اسپیکر چنے گئے امرتسر جنوب کے رکن اسمبلی اندربیر سنگھ نجر، رائے سکھ طبقہ سے آنے والے گرو ہرسہائے سے رکن اسمبلی فوجا سنگھ ساراری، سمانا رکن اسمبلی چیتن سنگھ جوراماجرا اور پارٹی کے یوتھ وِنگ کے سربراہ اور کھرڑ رکن اسمبلی اور گلوکار سے لیڈر بنے انمول گگن مان نے حلف لیا۔ حلف لینے کا آرڈر کابینہ میں ان کی سینئریٹی کے مطابق تھا۔

قابل ذکر ہے کہ بدعنوانی کے خلاف ایک بڑی کارروائی کرتے ہوئے وزیر صحت وجئے سنگلا کو 24 مئی کو ریاستی کابینہ سے برخاست کر دیا گیا تھا اور بدعنوانی کے الزامات میں انھیں گرفتار کر لیا گیا تھا۔ وزیر اعلیٰ مان نے کہا ہے کہ ان کی حکومت بدعنوانی کے تئیں زیرو ٹولرنس کی پالیسی اختیار کر رہی ہے۔