پونے پورش حادثہ: انیل دیشمکھ کا حکومت پر سخت الزام، کہا- ’مرنے والوں کو ملزم بنانے کی کوشش کی جا رہی ہے‘

پونے پورش کار حادثہ کیس میں این سی پی-ایس پی کے ایم ایل اے اور سابق وزیر انیل دیشمکھ کا بڑا بیان سامنے آیا ہے۔ انہوں نے کہا ہے پونے کے ہٹ اینڈ رن کیس میں مرنے والے لڑکے اور لڑکی کی وسرا رپورٹ الکوحل پازیٹو آئے گی اور وشال اگروال کی رپورٹ منفی آئے گی۔ ایسا اس لیے تاکہ مرنے والوں کو ہی ملزم ٹھہرا یا جائے۔ بہت بڑی بدمعاشی ہونے والی ہے جسے میں شیئر کرنا چاہتا ہوں۔

انیل دیشمکھ ریاست کے اہم سابق وزیر رہ چکے ہیں اور این سی پی-ایس پی کے قد آور لیڈر ہیں۔ انہوں نے کہا ہے کہ ریاستی حکومت کی مہربانی سے مرنے والوں کی ’وسرا رپورٹ‘ الکوحل مثبت آئے گی اور وشال اگروال کی الکوحل رپورٹ منفی آئے گی۔ اس کا مطلب ہے کہ مرنے والوں کو ملزم بنانے کی کوشش کی جا رہی ہے۔ انہوں نے مزید کہا کہ سیاسی دباؤ میں کیا ہوتا ہے؟ یہ دیکھا جا سکتا ہے۔ بہت بڑی بدمعاشی ہونے والی ہے، میں یہ معلومات شیئر کرنا چاہتا ہوں۔

جووینائل جسٹس بورڈ (جے جے بی) نے بدھ (12 جون) کو گزشتہ ماہ پونے پورش کار حادثہ میں دو آئی ٹی انجینئروں کی موت سے متعلق معاملے میں ملزم 17 سالہ نوجوان کی آبزرویش ہوم (گھر میں نظر بند رکھ کر نگرانی) میں رکھنے کی مدت میں 25 جون تک توسیع کر دی ہے۔ اس سے قبل پولیس نے بورڈ کے سامنے دلیل دی تھی کہ ملزم کی ابھی کونسلنگ اور معاملے کی تفتیش جاری ہے۔ پونے پولیس نے استغاثہ کے ذریعے ملزم کو مزید  14 دنوں تک آبزرویشن ہوم میں رکھنے کی درخواست کی تھی جس پر عدالت نے یہ مدت 25 جون تک بڑھا دی ہے۔