پوجا کھیڈکر کو دہلی کی عدالت سے جھٹکا، پیشگی ضمانت کی درخواست مسترد

نئی دہلی: برطرف آئی اے ایس افسر پوجا کھیڈکر کو دہلی کی پٹیالہ ہاؤس عدالت سے جھٹکا لگا ہے۔ عدالت نے ان کی پیشگی ضمانت کی درخواست مسترد کر دی ہے۔ اس سے پہلے یونین پبلک سروس کمیشن (یو پی ایس سی) نے پوجا کھیڈکر کا بطور ٹرینی آئی اے ایس آفیسر کے انتخاب کو منسوخ کر دیا تھا، اس کے علاوہ ان پر کمیشن کی جانب سے مستقبل میں منعقد ہونے والے کسی بھی امتحان میں شرکت پر بھی پابندی عائد کر دی گئی ہے۔ یو پی ایس سی نے انہیں متعدد بار فرضی شناخت کا استعمال کرتے ہوئے امتحانات میں شرکت کرنے کا قصوروار پایا ہے۔ کمیشن نے ایک بیان میں کہا ہے کہ کھیڈکر کو سول سروسز امتحان کے قواعد کی خلاف ورزی کا قصوروار پایا گیا ہے۔

بیان میں کہا گیا ہے کہ یونین پبلک سروس کمیشن (یو پی ایس سی) کی جانب سے 18 جولائی، 2024 کو سول سروس امتحان-2022 (سی ایس ای-2022) کی عارضی طور پر تجویز کردہ امیدوار پوجا منورما دلیپ کھیڈکر کو دھوکہ دہی کے لیے وجہ بتاؤ نوٹس (ایس این سی) جاری کیا تھا۔ انہوں نے اپنی فرضی شناخت ظاہر کرتے ہوئے امتحانی قواعد میں دی گئی جائز حد سے زیادہ کوششیں کی تھیں۔

بیان میں کہا گیا ہے کہ کھیڈکر کو 25 جولائی تک نوٹس کا جواب دینا تھا لیکن انہوں نے 4 اگست تک کا وقت مانگا۔ یو پی ایس سی نے انہیں 30 جولائی تک کا وقت دیا اور واضح کیا کہ یہ ’آخری موقع‘ ہے اور وقت کی مزید توسیع کی اجازت نہیں ہوگی۔ پینل کی طرف سے یہ بھی بتایا گیا تھا کہ اگر آخری تاریخ تک کوئی جواب نہیں ملتا تو یو پی ایس سی کارروائی کرے گی۔ پینل نے ایک بیان میں کہا، ’’اس کی آخری تاریخ میں توسیع کے باوجود، وہ مقررہ وقت کے اندر اپنی وضاحت پیش کرنے میں ناکام رہیں۔‘‘

یو پی ایس سی نے کہا ہے کہ دستیاب ریکارڈ کا بغور جائزہ لیا گیا۔ وہ سی ایس ای-2022 قواعد کی دفعات کی خلاف ورزی کرتے ہوئے کام کرنے کا قصوروار پایا گیا ہے۔ سی ایس ای-2022 کے لئے ان کی عارضی امیدواری منسوخ کر دی گئی ہے اور انہیں مستقبل کے تمام امتحانات سے مستقل طور پر روک دیا گیا ہے۔

پینل نے کہا کہ پوجا کھیڈکر کے واقعہ کے تناظر میں، اس نے 15,000 سے زیادہ امیدواروں کے ڈیٹا کی جانچ کی ہے جنہوں نے 2009 اور 2023 کے درمیان آئی اے ایس اسکریننگ کے عمل کو کلیئر کیا تھا۔ ’’اس تفصیلی مشق کے بعد سوائے پوجا منورما دلیپ کھیڈکر کے کوئی دوسرا امیدوار سی ایس ای کے قوانین کے تحت اجازت سے زیادہ کوششوں کا فائدہ اٹھاتے ہوئے نہیں پایا گیا ہے۔‘‘