ممبئی: عید میلادالنبیؐ کی تعطیل 16 ستمبر کی بجائے 18 ستمبر کو ہوگی، محکمہ جنرل ایڈمنسٹریشن کا اعلان

ممبئی میں عید میلادالنبیؐ کی تعطیل بروز بدھ 18 ستمبر 2024 کو ہوگی، جو کہ پہلے 16 ستمبر 2024 کو مقرر تھی۔ جنرل ایڈمنسٹریشن ڈیپارٹمنٹ نے ایک اعلامیہ کے ذریعے اس تبدیلی کا اعلان کیا ہے۔ خیال رہے کہ 2024 کے لیے ریاستی حکومت نے کل 24 سرکاری تعطیلات کا اعلان کیا تھا، جن میں عید میلادالنبیؐ کی تعطیل بھی شامل تھی۔

سابق کانگریس وزیر نسیم عارف خان نے بھی عید میلادالنبیؐ کی تعطیل کے متعلق یہی مطالبہ کیا تھا۔ عید میلادالنبیؐ اسلامی مہینے ربیع الاول کی 12 تاریخ کو منایا جاتا ہے اور یہ دن مسلمانوں کے درمیان خاص اہمیت رکھتا ہے۔ اس موقع پر بڑے پیمانے پر جلوس نکالے جاتے ہیں، جو عموماً شہر کے مختلف علاقوں سے گزرتے ہیں۔

اس سال عید میلاد 16 ستمبر بروز پیر کو ہے لیکن چونکہ منگل 17 ستمبر کو گنیش چترتھی کا ہندو تہوار ہے اور اس کی مناسبت سے خاص طور پر مہاراشٹر میں بڑے پیمانے پر جلوس و تقریبات کا اہتمام کیا جاتا ہے۔ اس لیے امن و امان کو برقرار رکھنے کے مقصد سے مسلمانوں نے عید میلادالنبیؐ کے جلوس 18 ستمبر بروز بدھ کو نکالے جانے کا فیصلہ کیا ہے۔

اس فیصلے کی بنیاد پر عید میلاد کی تعطیل پیر، 16 ستمبر 2024 کو نہیں ہوگی، بلکہ اس کی جگہ بدھ، 18 ستمبر 2024 کو ہوگی۔ ممبئی شہر، ممبئی کے مضافات، اور کئی دیگر اضلاع میں دونوں برادریوں کے درمیان امن و ہم آہنگی کو برقرار رکھنے کے لیے یہ فیصلہ کیا گیا ہے۔

یہ تعطیل تمام سرکاری دفاتر، اسکولوں، کالجوں اور دیگر اداروں میں مؤثر ہوگی، اور اس کے مطابق عوامی تعطیلات کا شیڈول بھی تبدیل کر دیا گیا ہے۔

(یو این آئی ان پٹ کے ساتھ)