یوکرین جنگ، فرقہ وارانہ تشدد اور لاؤڈ اسپیکر تنازعہ پر اکسانے والی رپورٹنگ! چینلوں کے لئے رہنما ہدیات جاری

نئی دہلی: روس-یوکرین جنگ، فرقہ وارانہ تشدد اور لاؤڈ اسپیکر تنازعہ پر نیوز چینلوں کی جانب سے نشر کئے جانے والے ڈیبیٹ شوز پر وزارت برائے اطلاعات اور نشریات نے ناراضگی کا اظہار کیا ہے۔ وزارت نے نیوز چینلوں کے لئے رہنما ہدایات جاری کرتے ہوئے کہا ہے کہ اکسانے والی، غیر سماجی، غیر پارلیمانی سرخی کے استعمال سے اجتناب کریں۔ مرکزی حکومت نے سختی سے کہا ہے کہ تمام نیوز چینل کیبل ٹیلی ویژن نیٹورک (ریگولیشن) قانون 1995 کی ہدایات پر عمل کریں۔

حکومت نے واضح طور پر کہا ہے کہ حکم کی خلاف ورزی کرنے والے نیوز چینلوں پر پابندی عائد کی جا سکتی ہے۔ رہنما ہدایات میں کہا گیا ہے کہ ٹیلی ویژن نیٹورک (ریگولیشن) قانون 1995 کی دفعہ 20 مرکز کو یہ اختیار دیتی ہے کہ وہ ٹی وی چینلوں کے خلاف اقدام لے سکتی ہے۔ رہنما ہدایات میں کہا گیا ہے کہ اگر کسی ٹی وی پروگرام میں اصولوں کی خلاف ورزی کی جاتی ہے تو اس کے خلاف کارروائی عمل میں لائی جائے گی۔

دہلی کے جہانگیر پوری میں ہونے والے تشدد اور اس کے بعد کی انہدامی کارروائی کے درمیان مختلف ڈیبیٹ شوز پر اعتراض ظاہر کرتے ہوئے اطلاعات و نشریات کی وزارت نے کہا کہ مختلف موضوعات پر ٹی وی چینلوں میں غیر مصدقہ، گمراہ کن، سنسنی خیز اور معاشرہ میں ناقابل قبول زبان کا استعمال کیا گیا۔

وزارت نے مزید کہا کہ یوکرین-روس کے بارے میں جھوٹے دعوے اور بین الاقوامی ایجنسیوں کے بار بار غلط حوالے سے شہ سرخیاں پیش کی گئیں، جن کا خبروں سے کوئی تعلق نہیں تھا اور صحافیوں اور نیوز اینکرز نے ناظرین کو جوش دلانے کے لیے پسندیدہ اور من گھڑت مواد پیش کیا۔ اس کے علاوہ جہانگیرپوری معاملہ کے حوالے سے فرقہ وارانہ تشدد کو بھڑکانے والی اشتعال انگیز سرخیاں اور ویڈیوز دکھائی گئیں۔

وزارت نے مزید کہا کہ ایک خاص فرقہ کی ویڈیوز دکھا کر فرقہ وارانہ کشیدگی کو ہوا دی گئی اور اتھارٹی کی انہدامی کارروائی کو فرقہ وارانہ رنگ دینے کی کوشش کی گئی۔ اس کے ساتھ ایسی سی سی ٹی وی فوٹیج بھی پیش کی گئیں، جن کی تصدیق نہیں ہوئی۔ اس طرح کے تبصرے کیے گئے جس سے فرقہ وارانہ ہم آہنگی کے درہم برہم ہونے کا خطرہ لاحق ہوا۔

حکومت نے اس پر سخت تشویش کا اظہار کیا ہے اور سخت ہدایات بھی دی ہیں کہ ایسی چیزوں سے گریز کیا جائے۔ ڈیبیٹ شوز میں مختلف پروگراموں کے دوران لاؤڈ اسپیکر سے متعلق قابل اعتراض زبان کے استعمال پر بھی مرکز نے ناراضگی ظاہر کی ہے۔