میرٹھ: سابق وزیر یعقوب قریشی کی سو کروڑ کی ملکیت قرق

میرٹھ: اترپردیش حکومت کے سابق وزیر یعقوب قریشی کے خلاف غیر قانونی طور سے گوشت کا کاروبار کرنے کے معاملے میں ان کی تقریبا سو کروڑ روپئے کی ملکیت قرق کرلی گئی ہے۔ بدھ کی صبح ہی یعقوب قریشی کی میٹ فیکٹری کو قرق کی کارروائی کرتے ہوئے سیل کر دیا گیا تھا۔

پولیس نے بتایا کہ بغیر اجازت مویشی کاٹنے کے معاملے میں مقدمہ درج ہونے کے بعد سے یعقوب اور ان کا پورا کنبہ لمبے وقت سے فرار ہیں۔ اس بابت کئی بار ان کے گھر پر نوٹس بھی چسپاں کیا گیا تھا۔ یعقوب نے الہ آباد ہائی کورٹ سے راحت حاصل کرنے کی کوشش بھی کی، لیکن کامیابی نہیں مل سکی۔

میرٹھ کے اے ایس پی چندرکانت مینا نے اس معاملے کی جانچ کی بنیاد پر بتایا کہ الفہیم میٹیکس کمپنی کی آڑ میں یعقوب کا کنبہ چار الگ الگ کمپنیاں چلا رہی تھیں۔ جس سے ٹیکس کی چوری کی جاسکے۔ دو کمپنی میں یعقوب کا کنبہ شیئر ہولڈر ہے جبکہ الفوزان کمپنی عمران کے بیٹے فوزان کے نام پر ہے۔

قابل ذکر ہے کہ ہاپوڑ روڈ واقع یعقوب قریشی کی فیکٹری میں 31 مار چ کی دیر رات پولیس نے غیر قانونی طریقے سے میٹ کی پیکنگ کرتے 10ملازمین کو رنگے ہاتھوں پکڑا تھا۔ اس معاملے میں یعقوب قریشی، ان کی بیوی سنجیدہ بیگم، بیٹے عمران اور فیروز سمیت 17 افراد کو نامزد ملزم بنایا گیا تھا۔

ایس پی(دیہات) کیشو کمار کا کہنا ہے کہ یعقوب قریشی کے گھر پر قرقی وارنٹ چسپاں کیا گیا تھا۔ اس میں عدالت نے یعقوب کو کنبے کے ساتھ پیش ہونے کا حکم دیا تھا۔ یعقوب کی جانب سے اس نوٹس کا کوئی جواب نہیں دیا گیا۔ اس کے بعد آج قرقی کی کارروائی کی گئی ہے۔