پرینکا گاندھی ’5 گارنٹی‘ لے کر پہنچیں مدھیہ پردیش، ہر خاتون کو 1500 روپے ماہانہ، 100 یونٹ بجلی مفت، اور...

کانگریس کی قومی جنرل سکریٹری پرینکا گاندھی آج مدھیہ پردیش کے جبل پور پہنچیں اور کاگنریس کی انتخابی تشہیر کا بگل پھونکتے ہوئے لوگوں کو پانچ گارنٹی دینے کا اعلان کر دیا۔ انھوں نے وعدہ کیا کہ ریاست میں کانگریس کی حکومت بنتے ہی ان گارنٹی کو پورا کیا جائے گا۔

جبل پور کے شہید اسمارک میں منعقد جلسہ عام میں پرینکا گاندھی نے ریاست کی شیوراج سنگھ چوہان کی قیادت والی حکومت پر جم کر حملہ کیا اور موجودہ دور کی سیاست کا بھی تذکرہ کیا۔ انھوں نے کہا کہ ریاست میں 18 سال سے بی جے پی کی حکومت ہے اور اس نے صرف وعدے اور اعلانات کرنے کا ہی کام کیا ہے۔ انھوں نے کہا کہ یہ شرمناک ہے کہ گزشتہ تین سالوں میں صرف 21 لوگوں کو ہی یہ حکومت ملازمت دے سکی ہے۔

اس دوران پرینکا گاندھی نے رواں سال ہونے والے ریاستی اسمبلی انتخاب سے متعلق عوام سے پانچ وعدے کیے ہیں۔ انھوں نے کہا کہ ریاست میں ہر خاتون کو 1500 روپے ماہانہ دیئے جائیں گے، گیس سلنڈر ایک ہزار روپے میں نہیں بلکہ 500 روپے میں ملے گا، 100 یونٹ بجلی مفت ہوگی جبکہ 200 یونٹ بجلی کی نصف رقم ادا کرنی ہوگی، سرکاری ملازمتوں کے لیے پرانی پنشن اسکیم کو نافذ کیا جائے گا اور کسانوں کی قرض معافی کو جاری رکھا جائے گا۔

پرینکا گاندھی نے مدھیہ پردیش کی شیوراج سنگھ چوہان حکومت کو گھوٹالوں کی حکومت قرار دیا۔ انھوں نے کہا کہ یہ حکومت 220 ماہ سے ریاست میں برسراقتدار ہے اور اس دوران 225 گھوٹالے ہوئے ہیں۔ اس سے صاف ہے کہ ہر ماہ ایک گھوٹالہ ہوا۔ ساتھ ہی پرینکا گاندھی نے وزیر اعظم نریندر مودی کو بھی تنقید کا نشانہ بنایا۔ کرناٹک کے اسمبلی انتخاب کے دوران وزیر اعظم نریندر مودی نے مخالفین کے ذریعہ گالیاں دینے کا معاملہ اٹھایا تھا، اس پر طنز کستے ہوئے پرینکا گاندھی نے کہا کہ مودی کی گالی والی فہرست سے مدھیہ پردیش کی گھوٹالوں کی فہرست کہیں طویل ہے۔ یہاں نرمدا ندی ہو، مہاکال کوریڈور ہو، گھوٹالے کے معاملے میں کسی کو بھی نہیں چھوڑا گیا۔

پرینکا گاندھی نے کہا کہ وہ یہاں ووٹ مانگنے نہیں آئی ہیں، لوگوں کو جگانے آئی ہیں۔ انھوں نے میڈیا پر طنز کستے ہوئے کہا کہ جو کچھ بتایا اور دکھایا جاتا ہے وہ حقیقت سے دور ہے۔ اس کے لیے انھوں نے ایک قصہ بھی سنایا۔ اس کے ذریعہ لوگوں سے کہا کہ وہ میڈیا کی باتوں پر بھروسہ نہ کریں بلکہ حقیقت کو جانیں اور خود فیصلہ لیں۔

واضح رہے کہ ریاست میں رواں سال اسمبلی انتخاب ہونے والے ہیں اور پرینکا گاندھی اسمبلی انتخابی تشہیر کا بگل بجانے پہنچی ہیں۔ وہ بذریعہ طیارہ جبل پور پہنچیں اور اس کے بعد نرمدا ندی کے ساحل پر گواری گھاٹ پر پہنچ کر انھوں نے پوجا کی اور نرمدا میا کی آرتی کی۔ اس موقع پر ان کے ساتھ کانگریس کے ریاستی صدر کمل ناتھ، رکن پارلیمنٹ وویک تنکھا سمیت تمام دیگر لیڈران موجود رہے۔