’پرچار میں بہَار ہے، لیکن نوجوان نوکری سے باہر ہے‘ پرینکا گاندھی کا یوگی آدتیہ ناتھ پر طنز

لکھنؤ: کانگریس کی جنرل سکریٹری پرینکا گاندھی نے وی ڈی او (افسر برائے دیہی ترقی) کی بھرتی منسوخ کیے جانے کے بعد یوگی حکومت پر طنز کیا ہے۔ پرینکا گاندھی نے ٹوئٹ کیا کہ ’وی ڈی او- 2018‘ کا مقابلہ کا امتحان دینے کے بعد نوجوانوں نے 2021 تک تقرری کا انتظار کیا۔ تاریخ پر تاریخ آتی گئی۔ تقرری نہیں ملی، ہر نئی تاریخ ایک پتھر کی طرح چوٹ کرتی تھی۔

پرینکا گاندھی نے مزید لکھا کہ گزشتہ روز بھرتی منسوخ ہو گئی، ان نوجوانوں کی آنکھوں میں اندھیرا آگیا۔ سی ایم صاحب کے پرچار میں بہار ہے، مگر یوپی کا نوجوان نوکری سے باہر ہے۔

خیال رہے کہ بدھ کے روز اتر پردیش سب آرڈینیٹ سروسز سلیکشن کمیشن (یو پی ایس ایس ایس سی) کے ذریعہ جاری کردہ افسر برائے دیہی ترقی، گرام پنچایت افسر اور افسر برائے سماجی بہبود کے عہدوں پر مقابلہ امتحان 2018 کو منسوخ کر دیا۔ اس کے تحت مجموعی طور پر 1953 اسامیوں پر بھرتی ہونی تھی۔

ان بھرتیوں کے لئے 30 مئی 2018 کو نوٹیفکیشن جاری کیا گیا تھا۔ نوٹیفکیشن کے مطابق 1527 اسامیاں گرام پنچایت افسر، 362 اسامیاں افسر برائے دیہی ترقی اور 62 اسامیاں سماجی بہبود کے سپروائیزر کے لئے خالی تھیں۔