پرینکا گاندھی نے ’انتخابی سیاست‘ میں رکھا قدم، کانگریس نے وائناڈ لوک سبھا سیٹ سے بنایا امیدوار

کانگریس جنرل سکریٹری پرینکا گاندھی نے ’انتخابی سیاست‘ میں قدم رکھنے کا فیصلہ کر لیا ہے۔ آج جیسے ہی کانگریس پارٹی نے کیرالہ کی وائناڈ لوک سبھا سیٹ پر ہونے والے ضمنی انتخاب کے پیش نظر پرینکا گاندھی کا نام بطور امیدوار اعلان کیا، ویسے ہی ان سوالوں پر فل اسٹاپ لگ گیا کہ وہ انتخابی سیاست میں کب اتریں گی۔

قابل ذکر ہے کہ کانگریس کے سابق صدر راہل گاندھی لوک سبھا انتخاب 2024 میں وائناڈ پارلیمانی سیٹ سے کامیاب ہوئے تھے۔ چونکہ انھوں نے رائے بریلی سے بھی جیت حاصل کی تھی، اس لیے بعد میں قوانین کو پیش نظر رکھتے ہوئے وائناڈ سیٹ سے استعفیٰ دے دیا تھا۔ جس وقت راہل گاندھی نے یہ سیٹ چھوڑی تھی، اسی وقت کانگریس نے صاف کر دیا تھا کہ اس سیٹ پر جب ضمنی انتخاب ہوگا تو پرینکا گاندھی امیدوار ہوں گی۔ اب جبکہ کانگریس نے پرینکا کا نام امیدوار کے طور پر پیش کر دیا ہے، تو ان کے انتخابی سیاست میں قدم رکھنے پر مہر بھی لگ گئی ہے۔

قابل ذکر ہے کہ آج ہی الیکشن کمیشن نے وائناڈ میں 13 نومبر کو ووٹنگ کرانے کا اعلان کیا اور ساتھ ہی بتایا کہ ووٹ شماری 23 نومبر کو ہوگی۔ دراصل الیکشن کمیشن نے مہاراشٹر و جھارکھنڈ اسمبلی انتخابات کے لیے تاریخوں کا اعلان کرنے کے ساتھ ساتھ ملک بھر کی 48 اسمبلی سیٹوں اور 2 پارلیمانی سیٹوں پر بھی ضمنی انتخاب کرانے کا اعلان کیا ہے۔ سبھی انتخابات کے نتائج ایک ساتھ یعنی 23 نومبر کو ہی سامنے آئیں گے۔

بہرحال، کانگریس نے پرینکا گاندھی کو وائناڈ سے امیدوار بنانے کے ساتھ ساتھ کیرالہ اسمبلی کی کچھ سیٹوں پر ہونے والے ضمنی انتخاب کے لیے بھی امیدواروں کا نام ظاہر کر دیا ہے۔ کیرالہ کی چلکّارا اسمبلی سیٹ پر ہونے والے ضمنی انتخاب کے لیے رامیا ہریداس اور پلکّڑ سیٹ کے لیے راہل ممکوٹتھی کو امیدوار بنایا گیا ہے۔ ان دونوں اسمبلی سیٹوں پر بھی ووٹ 13 نومبر کو ہی ڈالے جائیں گے۔