روڈ شو کے لئے آسام پہنچیں پرینکا گاندھی

گوہاٹی: کانگریس کی اسٹار کمپینر اور جنرل سکریٹری پرینکا گاندھی جنوبی آسام کے سلچر میں پارٹی کی موجودہ رکن پارلیمنٹ سشمتا دیو کے پارلیمانی حلقے میں روڈ شو کے لئے پہنچی۔ رپورٹ کے مطابق کانگریس اترپردیش (مشرق) کی انچارج پرینکاگاندھی سلچر کے صدر گھاٹ سے رانگرکھاری تک روڈ شو میں حصہ لیا۔

آسام کے مختلف حصوں سے کانگریس کے حامیوں نے پرینکا گاندھی سے آسام میں دورہ کرنے اور ریاست میں پارٹی کے امیدواروں کے لئے تشہیر کرنے کا مطالبہ کیا تھا۔ حالانکہ آسام میں پانچ لوک سبھا پارلیمانی حلقوں جورہاٹ، ڈبروگڑھ، کلیابور، تیج پور اور لکھیم پور میں 11 اپریل کو لوک سبھا کے پہلے مرحلے میں ووٹنگ ہوچکی ہے جبکہ 18 اپریل کو دوسرے مرحلے میں براک گھاٹی، وسطی آسام اور پہاڑی علاقوں میں ووٹنگ ہونی ہے۔

سلچر پارلیمانی حلقے سے کانگریس نے موجودہ رکن پارلیمنٹ اور خواتین کانگریس کی قومی صدر سشمیتا دیو کو پارٹی کے امیدوار کے طورپر اتاراہے۔ کانگریس کے صدر راہل گاندھی کے علاوہ پارٹی کے دیگر اسٹار مہم جوؤں میں نوجوت سنگھ سدھو پہلے ہی سلچر میں سشمتا دیو کےلئے انتخابی تشہیر کرچکے ہیں۔

کانگریس نے اعلان کیا ہے کہ اگر ان کی پارٹی اقتدار میں آتی ہے اور سشمتا دیو کو پھر سے رکن پارلیمنٹ منتخب کیا جاتاہے، تو انہیں مرکز میں کانگریس کی قیادت والی حکومت میں وزیر بنایا جائے گا۔