پرینکا گاندھی للت پور پہنچ گئیں ، مارے گئے کسانوں کے اہل خانہ سے ملاقات کریں گی

کانگریس جنرل سکریٹری اور اتر پردیش کی انچارج پرینکا گاندھی آج صبح ٹرین کے ذریعہ للت پور پہنچ گئیں اور وہ وہاں دو کسانوں کے خاندانوں کو تسلی دینے کے لیے ملاقات کریں گی جن کی حال ہی میں کھاد بحران کے دوران موت ہو گئی تھی۔

واضح رہے پرینکا گاندھی جمعرات کی رات لکھنؤ سے ٹرین کے ذریعے للت پور کے لیے روانہ ہوئی تھیں ۔للت پور روانگی سے پہلے پرینکا گاندھی نے اسٹیشن پر قلیوں سے ملاقات کی اور انہوں نے ان کے مسائل کے بارے میں پوچھا۔ للت پور اسٹیشن پر بڑی تعداد میں کانگریس کارکنان موجود تھے۔

واضح رہے کہ اس ہفتے کو للت پور کے تھانہ نارہاٹ میں واقع بنیانہ گاؤں کے کسان مہیش کمار ویور کی طویل عرصے سے کھاد کے حصولی مرکز میں لائن میں کھڑے ہونے کی وجہ سے موت ہو گئی تھی۔ اس کے ایک دن بعد للت پور ضلع کے مالواڑہ خورد گاؤں کے کسان سونی اہیروار نے تین دن تک کھاد نہ ملنے کی وجہ سے مایوس ہوکر خودکشی کرلی۔

بندیل کھنڈ سمیت ریاست کے مختلف علاقوں میں کیمیائی کھاد کی بلیک مارکیٹنگ کی وجہ سے کسانوں کو کھاد نہ ملنے سے بحران مزید گہرا ہوگیا ہے۔ جین نے بتایا کہ پرینکا گاندھی دونوں متوفی کسانوں کے اہل خانہ سے ملاقات کریں گی۔