پرینکا نے روپے کی گرتی ہوئی قدر پر تشویش کا اظہار کیا

کانگریس کی سینئر رہنما  پرینکا گاندھی نے بین الاقوامی کرنسی مارکیٹ میں روپے کی گرتی ہوئی قدر پر تشویش کا اظہار کرتے ہوئے کہا کہ گراوٹ کے تمام ریکارڈ ٹوٹ گئے ہیں۔ ہفتہ کو سوشل میڈیا پر جاری ایک پوسٹ میں محترمہ پرینکا گاندھی نے کہا کہ ڈالر کے مقابلے روپیہ اب تک کی کم ترین سطح پر آ گیا ہے۔ ایک ڈالر کی قیمت 83.61 روپے ہوگئی ہے۔

انہوں نے کہا کہ متحدہ ترقی پسند اتحاد (یو پی اے) کی حکومت کے دوران جب ایک ڈالر کی قیمت 58-59 روپے تھی، نریندر مودی جی کہا کرتے تھے کہ میں حکومت میں بیٹھا ہوں، مجھے سب کچھ معلوم ہے۔ کسی بھی ملک کی کرنسی اس طرح نہیں گر سکتی۔‘‘

کانگریس لیڈر نے کہا کہ آج مودی خود وزیر اعظم ہیں اور روپے کی گراوٹ کے تمام ریکارڈ ٹوٹ چکے ہیں۔ اب وہ اس پر بات کرنے کے بجائے عوام کی توجہ ادھر ادھر بھٹکاتے ہیں۔ واضح رہے منموہن سنگھ کی حکومت کے دوران جب روپے کی قیمت امریکی ڈالر کے مقابلہ میں گرتی تھی تو بی جے پی کی جانب سے کافی تنقید کی جاتی تھی اور اس  روپے کےگرنے کا موازنہ اس وقت کے وزیر اعظم منموہن سنگھ کی عمر سے بھی کیا جاتا تھا۔