وزیر اعظم نریندر مودی نے کچھ میں فوجیوں کے ساتھ منائی دیوالی، فوجی لباس میں آئے نظر

پورے ملک میں آج دیوالی کا تہوار پورے جوش و خروش کے ساتھ منایا جا رہا ہے۔ اس موقع پر ہندوستان کے وزیر اعظم نریندر مودی نے گجرات کے کچھ میں جوانوں کے ساتھ دیوالی منائی۔ ساتھ ہی فوجی جوانوں کو مٹھائی بھی کھلائی۔ نریندر مودی اس دوران فوج کے لباس میں نظر آئے۔

فوجی جوانوں کے ساتھ دیوالی منانے سے قبل نریندر مودی نے آزاد ہندوستان کے پہلے وزیر داخلہ سردار ولبھ بھائی پٹیل کے یوم پیدائش کے موقع پر انہیں خراج عقیدت پیش کیا۔ انہوں نے گجرات کے نرمدا ضلع کے ایکتا نگر میں ’اسٹیچو آف یونیٹی‘ کے قریب ایک اجلاس سے خطاب کیا۔ خطاب کے دوران انہوں نے کہا کہ ’’دہشت گردوں کے آقاؤں کو پتہ چل گیا ہے کہ ہندوستان کا اب کچھ نہیں ہو سکتا، کیونکہ ہندوستان اب کسی دہشت گرد کو نہیں چھوڑے گا۔‘‘

وزیر اعظم نریندر مودی نے سوشل میڈیا پلیٹ فارم ’ایکس‘ پر پوسٹ کر کے دیوالی کی مبارکباد دی۔ انہوں نے کہا، ’’ہم وطنوں کو دیوالی کی بہت بہت مبارکباد۔ روشنی کے اس روحانی تہوار پر میں ہر کسی کی صحت، خوشی اور خوش قسمت زندگی کی خواہش کرتا ہوں۔ ماں لکشمی اور بھگوان شری گنیش کی مہربانی سے سب کا بھلا ہو۔‘‘

قابل ذکر ہے کہ وزیر اعظم نریندر مودی گزشتہ کئی سالوں سے فوجی جوانوں کے ساتھ ہی دیوالی کا تہوار مناتے آئے ہیں۔ وزیر اعظم کے عہدہ پر رہتے ہوئے پہلی بار گجرات کے کچھ میں دیوالی منانے کے لئے آئے۔ گجرات کے وزیر اعلیٰ کے عہدہ پر رہتے ہوئے انہوں نے کئی بار گجرات کے کچھ میں فوجی جوانوں کے ساتھ دیوالی منائی ہے۔