صدر جمہوریہ رام ناتھ کووند نے اپنی وداعی تقریب میں سیاسی پارٹیوں کو دی نصیحت

صدر جمہوریہ رام ناتھ کووند کی مدت کار 24 جولائی کو ختم ہو رہی ہے۔ اس کے پیش نظر آج پارلیمنٹ ہاؤس کے سنٹرل ہال میں ان کے لیے وداعی تقریب کا انعقاد ہوا۔ اس دوران رام ناتھ کووند نے سیاسی پارٹیوں کو کچھ اہم نصیحتیں دیں۔ انھوں نے کہا کہ ’’سیاسی پارٹیوں کو پارٹی پالیٹکس سے اوپر اٹھنا چاہیے اور عوام کی بھلائی کے لیے کام کرنا چاہیے۔‘‘

اپنی تقریر کے دوران رام ناتھ کووند نے کہا کہ ’’میں نے یہاں سنٹرل ہال میں ہندوستان کے صدر کی شکل میں حلف لیا تھا۔ میں نے پوری صلاحیت کے ساتھ اپنی ذمہ داریوں کو نبھایا۔ میرے دل میں سبھی اراکین پارلیمنٹ کے لیے خاص جگہ ہے۔ میرے ملک کے سبھی سابق صدور ترغیب کے ذرائع رہے ہیں۔‘‘ ساتھ ہی انھوں نے یہ بھی کہا کہ ’’پارلیمنٹ میں کبھی کبھی نااتفاقیاں ہوتی رہتی ہیں، مختلف پارٹیوں کے الگ الگ نظریے ہو سکتے ہیں، لیکن ہم لگاتار ایک کنبہ کی شکل میں کام کرتے رہتے ہیں۔‘‘

صدر کووند کا کہنا ہے کہ وہ جب پورے ملک کو ایک کنبہ کی شکل میں دیکھتے ہیں تو پتہ چلتا ہے کہ کسی مسئلہ کا حل نکالنے کے لیے کئی راستے ہو سکتے ہیں جو امن اور خیر سگالی پر مبنی ہوتے ہیں۔ شہریوں کو اپنے مطالبات کے لیے دباؤ بنانے کا حق ہے لیکن اسے پرامن طریقے سے ہی کیا جانا چاہیے۔

قابل ذکر ہے کہ صدر جمہوریہ رام ناتھ کووند کی الوداعی تقریب میں نائب صدر ایم ونکیا نائیڈو، وزیر اعظم نریندر مودی اور لوک سبھا اسپیکر اوم برلا سمیت کئی اراکین پارلیمنٹ موجود تھے۔ اس سے قبل جمعہ کی شب وزیر اعظم نریندر مودی نے رام ناتھ کووند کے اعزاز میں عشائیہ کا اہتمام کیا تھا۔ اس موقع پر مرکزی کابینہ کے اراکین، مختلف ریاستوں کے وزرائے اعلیٰ اور معزز شخصیات موجود تھے۔