ملیشیا کے وزیر اعظم انور ابراہیم نے صدر جمہوریہ مرمو سے ملاقات کی

ہندوستان کے دورے پرآئے ملیشیا کے وزیر اعظم انور ابراہیم نے منگل کو یہاں راشٹرپتی بھون میں صدرجمہوریہ دروپدی مرمو سے ملاقات کی۔محترمہ مرمو نے ملیشیا کے وزیر اعظم کے طور پر ہندوستان کے پہلے دورے پر آئے وزیر اعظم انور ابراہیم کا خیرمقدم کرتے ہوئے کہا کہ جمہوریت، کثیر الثقافتی، تکثیریت اور باہمی احترام کی مشترکہ اقدار ہندوستان اور ملیشیا تعلقات کے لیے رہنما قوت رہے ہیں۔

صدر جمہوریہ نے اس بات پر اطمینان کا اظہار کیا کہ ہندوستان اور ملیشیا نے جامع اسٹریٹجک شراکت داری کو مزید مضبوط کرنے کا فیصلہ کیا ہے۔ یہ بھی اچھی بات ہے کہ دونوں ملک اب شراکت داری کو عملی جامہ پہنانے کے لیے مختلف شعبوں میں تعاون کے لیے ایک روڈ میپ پر کام کر رہے ہیں۔

محترمہ مرمو نے کہا کہ ہندوستان ملیشیا کو ’گلوبل ساؤتھ‘ میں ایک مضبوط شراکت دار کے طور پر دیکھتا ہے۔ ملیشیا آسیان میں ہندوستان کا کلیدی شراکت دار ہے اور اس کی ایکٹ ایسٹ پالیسی اور انڈو پیسیفک ویژن میں ایک اہم ملک ہے۔

صدر جمہوریہ نے سال 2025 کے لیے ملیشیا کو آسیان چیئر بننے پر مبارکباد دی اور اس بات کا اعادہ کیا کہ ہندوستان ملیشیا کے ساتھ کام جاری رکھے گا اور ایک پرامن اور خوشحال ہند-بحرالکاہل خطے کے مشترکہ مقاصد کو پورا کرنے میں مکمل حمایت کرے گا۔صدر مرمو نے اس موقع پر ملیشیا کے بادشاہ سلطان ابراہیم کو ان کی تاجپوشی پر مبارکباد دی۔

قابل ذکر ہے کہ مسٹر ابراہیم نے دن میں وزیر اعظم نریندر مودی کے ساتھ دو طرفہ سربراہی ملاقات کی تھی۔ اس کے بعد وزیراعظم نے ان کے اعزاز میں ظہرانے کا اہتمام کیا تھا۔