جموں و کشمیر میں اسمبلی انتخابات کی تیاری شروع

نئی دہلی: وزیراعظم نریندر مودی نے جموں و کشمیر میں جمہوریت کے قیام پر اپنے عزم کا اظہار کرتے ہوئے اتوار کو کہا کہ مرکز کے زیرانتظام ریاست میں انتخابی حلقوں کی حد بندی کا کام اور مستقبل میں اسمبلی انتخابات کی تیاری شروع ہو چکی ہے۔ مودی نے 75ویں یوم آزاد کے موقع پر لال قلعہ کی فصیل سے خطا ب کرتے ہوئے کہا کہ جموں و کشمیر میں تمام حلقوں میں متوازن ترقی کا نتیجہ نظر آنے لگا ہے۔

انہوں نے کہا کہ تمام کو صلاحیت کے حساب سے مناسب موقع فراہم کرنا، یہی جمہوریت کی اصل روح ہے۔ جموں ہو یا کشمیر، ترقی کا توازن اب زمین پر نظر آرہا ہے۔ جموں کشمیر میں انتخابی حلقوں کے حدبندی کے لئے کمیشن قائم ہوچکا ہے اور مستقبل میں اسمبلی انتخابات کے لئے بھی تیاری چل رہی ہے۔

مودی نے کہا کہ لداخ بھی ترقی کی اپنے لامحدود امکانات کی طرف آگے بڑھ چلا ہے۔ ایک طرف وہاں جدید انفراسٹرکچر کی تعمیر ہو رہی ہے تو وہیں دوسری طرف ’سندھو سنٹرل یونیورسٹی‘ لداخ کو اعلی تعلیم کا مرکز بھی بنانے والی ہے۔