پریاگ راج: یوگی حکومت وعدہ خلافی کر رہی ہے، کھیتوں میں میٹر لگ جائیں گے تو مفت بجلی کیسے ملے گی؟ راکیش ٹکیت

 بھارتیہ کسان یونین کے قومی ترجمان راکیش ٹکیت نے یوپی حکومت کو سخت تنقید کا نشانہ بناتے ہوئے کہا ہے کہ وزیراعلیٰ یوگی آدتیہ ناتھ نے ایک سال تک کسانوں کو مفت میں بجلی دینے کا وعدہ کیا تھا لیکن افسران نے کسانوں کے کھیتوں میں میٹر لگانا شروع کر دیا ہے۔ انہوں نے سوال کیا کہ اگر میٹر لگ جائیں گے تو مفت میں بجلی کیسے ملے گی؟ ٹکیت نے پریاگ راج میں ایک کسان مہا پنچایت سے خطاب کے موقع پر یہ باتیں کہیں۔

'اے بی پی' کی خبر کے مطابق راکیش ٹکیت نے منڈیرا میں کہا کہ اگر میٹر لگانا ہے تو 2027 کے اسمبلی انتخابات سے پہلے اس معاملے کو اپنے منشور میں شامل کرنا ہوگا، نہیں تو کسان کے کھیت میں میٹر نہیں لگے گا۔ ٹکیت نے دھان کی قیمتوں کے معاملے پر بھی حکومت کو گھیرتے ہوئے الزام لگایا کہ پوروانچل میں جون پور، مرزا پور اور بلیا میں 1200 روپے فی کوئنٹل کی قیمت میں دھان کسانوں سے لیا جا رہا ہے۔ انہوں نے کہا کہ یہی حال مکّا کا ہے۔ کسان رہنما نے بتایا کہ بہار میں ایک لاکھ کروڑ روپے کا نقصان فصلوں کو کم قیمت پر فروخت کرنے سے کسانوں کو ہوتا ہے اور یہی حال سبھی ریاستوں کا ہے۔

راکیش ٹکیت نے الزام عائد کرتے ہوئے کہا کہ حکومت چاہتی ہے کہ لوگ بندھوا مزدور بن کر رہیں، یہ ایک بڑی سازش رچی جا رہی ہے۔  یہ حکومت ملک کو مزدوروں کا ملک بنانا چاہتی ہے کیونکہ صنعتعوں میں مزدوروں کی بہت کمی ہے جسے یہ پورا کرنا اس کی مجبوری ہے۔

اس موقع پر لارینس بشنوؑئی کے سلسلے میں پوچھے گئے ایک سوال کے جواب میں راکیش ٹکیت نے کہا کہ اگر بشنوئی سماج سے معافی مانگنے پر کوئی معاملہ حل ہو جاتا ہے تو اس میں بُرائی کیا ہے۔ اگر جانے انجانے میں کوئی غلطی ہو گئی ہے تو سلمان خان کو معافی مانگ لینے میں کیا جاتا ہے۔

قابل ذکر ہے کہ وزیر اعلیٰ یوگی آدتیہ ناتھ نے کسانوں کو مفت بجلی دینے کا اعلان کیا تھا جس میں بندیل کھنڈ کے کسانوں کو 1300 یونٹ ہر مہینہ اور دیگر اضلاع کے کسانوں کے لیے 1045 یونٹ بجلی مفت دینے کا وعدہ کیا گیا تھا۔