سہارا میں پھنسی رقم حاصل کرنے کے لیے حکومت نے قائم کیا پورٹل، جانیں کس طرح پیش کر سکتے ہیں درخواست!

نئی دہلی: مرکزی وزیر داخلہ اور کوآپریٹیو کے وزیر امت شاہ نے آج سہارا ریفنڈ پورٹل کا آغاز کیا ہے۔ اس پورٹل کے ذریعے سہارا میں پھنسے سرمایہ کاروں کو ان کی رقم واپس مل جائے گی۔ سہارا انڈیا میں ملک بھر کے لاکھوں سرمایہ کاروں کے کروڑوں روپے پھنسے ہوئے ہیں۔ اس پورٹل کے آغاز کے ساتھ ہی سرمایہ کار پرامید ہیں کہ اب ان کی سرمایہ کاری کی گئی رقم واپس آ جائے گی۔

سہارا ریفنڈ پورٹل کی افتتاحی تقریب میں امت شاہ نے کہا کہ جن لوگوں کے پیسے سہارا کی کوآپریٹیو سوسائٹیوں میں کئی سالوں سے پڑے تھے ان کو واپس کرنے کا عمل شروع کر دیا گیا ہے۔ انہوں نے کہا کہ ’’یہ ہمارے لیے فخر کی بات ہے کہ سپریم کورٹ کے ریٹائرڈ جج سرمایہ کاروں کے مسائل کو مدنظر رکھتے ہوئے کام کرتے ہیں۔ سرمایہ کاری کرنے والوں کو ان کا پیسہ واپس کرنے سے کوئی نہیں روک سکتا۔ یہ ایک بہترین شروعات ہے، شفافیت کے ساتھ کروڑوں لوگوں کو ان کی محنت کی کمائی واپس ملنا شروع کر دی ہے۔‘‘

اس ریفنڈ پورٹل کے ذریعے رقم ان سرمایہ کاروں کو واپس کی جائے گی جن کی سرمایہ کاری کی میچورٹی مکمل ہو چکی ہے۔ سرمایہ کار اس پورٹل پر اپنے نام درج کرائیں گے۔ تصدیق کے بعد ان کی رقم کی واپسی کا عمل شروع ہو جائے گا۔ سرمایہ کاروں کے دستاویزات کی 30 دنوں کے اندر سہارا گروپ کی کمیٹیوں سے تصدیق کی جائے گی۔

اس کے بعد، آن لائن دعویٰ داخل کرنے کے 15 دنوں کے اندر سرمایہ کاروں کو ایس ایم ایس کے ذریعے مطلع کیا جائے گا۔ اس کے بعد سرمایہ کاری کی رقم بینک اکاؤنٹ میں آجائے گی۔ یعنی اس عمل میں کم از کم 45 دن لگیں گے۔ اس کے بعد ہی سرمایہ کاروں کی رقم واپس آئے گی۔

خیال رہے کہ کوآپریٹیو کی وزارت نے سہارا گروپ کی سہارا کریڈٹ کوآپریٹو سوسائٹی لمیٹڈ، سہارا یونیورسل ملٹی پرپز سوسائٹی، ہمارا انڈیا کریڈٹ کوآپریٹو سوسائٹی لمیٹڈ اور اسٹارز ملٹی پرپز کوآپریٹو سوسائٹی لمیٹڈ کے پاس رقم جمع کرنے والے سرمایہ کاروں کو راحت فراہم کرنے کے لیے سپریم کورٹ میں عرضی دائر کی تھی۔ اس کے بعد سپریم کورٹ نے سی آر سی ایس کو 5000 کروڑ روپے منتقل کرنے کا حکم دیا تھا۔