علی گڑھ مسلم یونیورسٹی کا پولس محاصرہ جاری

علی گڑھ: علی گڑھ مسلم یونیورسٹی میں گذشتہ روز اے ایم یو طلباء پر پولس کی لاٹھی چارج اور ہوائی فائرنگ کے بعدایک درجن سے زائد طلباء کے شدید طور پرزخمی ہونے کے بعد سے اے ایم یو کیمپس کے حالات مزید خستہ ہوگئے ہیں طلباء کے غصہ کے مدنظر ان کے تیوروں سے گھبرائے ضلع و پولس انتظامیہ نے کیمپس کے باہر چوطرفہ مسلم یونیورستی کا محاصرہ کیا ہوا ہے۔ وہیں دوسری جانب طلباء نے اپنے غم و غصہ کا اظہار کرتے ہوئے باب سید پر دھرنا شروع کرتے ہوئے ڈیرہ جما لیا ہے جہاں اب سیاسی افراد کی آمد و رفت نے انتظامیہ کی پریشانی کو دوبالا کر دیا ہے۔ایک جانب جہاں طلباء یونین صدر کے ساتھ سینئر طلباء کے زخمی ہونے کے سبب طلباء نے بی جے پی کے ممبر پارلیمنٹ ستیش گوتم سمیت اے ایم یو کیمپس میں داخل ہوکر اشتعال انگیز نعرے بازی کرنے والے ہندو وادی افراد کے خلاف ایف آئی آر درج کر انہیں گرفتار کرنے اور ان کا ساتھ دینے والے پولس اہلکاروں کے خلاف بھی قانونی کاروائی کرنے کا مطالبہ کیا ہے۔دوسری جانب اے ایم یو ٹیچرس ایسو سی ایشن نے جرنل باڈی میٹنگ بلا کر طلباء سے احتیاط برتنے اور امن و امان بنائے رکھنے اور متحدہ طور پر نظم و نسق کی صورتحال کو قائم رکھنے کی اپیل کرتے ہوئے طلباء کے حق میں کھڑے ہونے کا اعلان کر دیا ہے ۔

ان سب کے خلاف سخت کاروائی کا مطالبہ اے ایم یو اولڈ بائز ایسو سی ایشن کی جانب سے بھی کیا گیا ہے۔اے ایم یو اولڈ بوئز ایسو سی ایشن کی جانب سے نائب صدر ڈاکٹر اعظم میر خان نے کہا ہے کہ اے ایم یو ایک قومی اقلیتی تعلیمی ادارہ ہے اور یہاں کی روایت نہایت سیکولر رہی ہے اور ہمیشہ سے یہاں آنے والے طلباء متحدہ تہذیبوں سے ہونے کے با وجود آپس میں مل جل کر رہتے ہیں کسی بھی طرح کی کوئی تفریق ایک دوسرے کے درمیان نہیں ہوتی ، لیکن چند مفاد پسند اور شر پسند افراد ملک کی گنگا- جمنی تہذیب کو مٹا دینا چاہتے ہیں اور ہندو مسلم اتحاد جو اے ایم یو کی تہذیب رہی ہے اس کو مٹا کر فرقہ واریت کا اڈا بنا دینا چاہتے ہیں جس کو اے ایم یو برادری کسی بھی قیمت پر کامیاب نہیں ہونے دےگی اور اے ایم یو کا وقار بلند ہوکر رہےگا۔ انہوں نے کھلے منچ سے اعلان کیا کہ جب تک کہ ہندو وادی ان افراد کے خلاف کاروائی نہیں ہوگی جو کیمپس میں داخل ہوکر فتنہ پھیلانا چاہتے تھے اس وقت تک طلباء یونین کو اولڈ بوئزایسو سی ایشن کی حمایت حاصل رہےگی۔

بی ایس پی لیڈر حاجی ضمیر اللہ نے بھی طلباء کے دھرنے پر پہنچ کر طلباء کو حمایت دینے کا اعلان کرتے ہوئے ان پولس اہلکاروں کو جیل بھیجنے کا مطالبہ کیا جنہوں نے معصوم اور بے گناہ طلباء پر لاٹھی چارج کی ، بے وجہ کاروائی کی اور ہندو وادیوں کی حمایت کرتے ہوئے ان کے خلاف کاروائی کرنے کے بجائے انہیں تھانے لے جاکر چھوڑ دیا ۔انہوں نے ضلع مجسٹریٹ اور کل ہی تبادلہ پر آئے پولس کپتان کووارننگ دیتے ہوئے کہا کہ وہ جیل جانے کے لئے تیار رہیں یا پھر اپنا تبادلہ کرا لیں، انہوں نے کہا کہ اگر بی ایس پی کی حکومت ہوتی تو یہ تمام ہندو وادی اور وہ پولس والے اب تک جیل جا چکے تھے جنہوں نے مسلم یونیورسٹی میں آگ لگانے کی نا کام کوشش کی ہے۔

خبر لکھے جانے تک اے ایم طلباء کا لاٹھی چارج کرنے والے اور ہندو وادیوں کا ساتھ دینے والے پولس افسران و اہلکاروں کے خلاف کاروائی کئے جانے کو لےکراحتجاج جاری ہے اور اے ایم یو میں ضلع انتظامیہ ،پولس و خفیہ ایجنسیاں برابراپنی نظر بنائے ہوئے ہیں۔