چھتیس گڑھ میں نکسلیوں سے پولیس کی مڈبھیڑ، 8 نکسلی ہلاک، ایک فوجی زخمی

نارائن پور: چھتیس گڑھ کے 4 اضلاع نارائن پور، کونڈاگاؤں، کانکیر اور دنتے واڑہ میں نکسلیوں کے خلاف مشترکہ آپریشن چلایا جا رہا ہے۔ دریں اثنا، نارائن پور میں نکسلیوں کے ساتھ مڈبھیڑ میں 8 نکسلی مارے گئے، جبکہ ایک فوجی جوان زخمی ہو گیا۔ پولیس افسر کے مطابق نکسلیوں کی موجودگی کی اطلاع پر سکیورٹی فورس نے سرحدی اضلاع کی پولیس کے ساتھ مشترکہ آپریشن کیا تھا۔

آخری اطلاع موصول ہونے تک ابوجھماڑ کے کُتُل فارسبیدہ کونڈامیٹا علاقے میں فوجیوں کا مشترکہ آپریشن جاری تھا۔ یہ آپریشن گزشتہ دو دنوں سے جاری ہے، جس میں نارائن پور، کونڈاگاؤں، کانکیر، دنتے واڑہ اضلاع کے ڈی آر جی، ایس ٹی ایف آئی ٹی بی ایف کے جوانوں کو شامل کیا گیا ہے۔

ریاست میں بھارتیہ جنتا پارٹی کی حکومت بننے کے بعد سلامتی دستوں نے نکسل علاقوں میں کئی آپریشن شروع کر دیئے ہيں۔ حال ہی میں فورس نے بیجاپور اور سکما میں بھی کارروائی انجام دی تھی، جس میں 7 نکسلی ہلاک ہوئے تھے۔

چھتیس گڑھ میں پولیس اور سیکورٹی فورسز کی مشترکہ ٹیم مسلسل نکسل مخالف آپریشن چلا رہی ہے جس میں اس سال اب تک 120 سے زیادہ نکسلی مارے جا چکے ہیں۔ گزشتہ مئی میں چھتیس گڑھ کے بیجاپور ضلع میں سیکورٹی فورسز کے ہاتھوں بڑی تعداد میں نکسلی مارے گئے تھے۔