پی ایم مودی مشکل حالات کو سمجھیں اور ’معاشی پیکیج‘ پر از سر نو غور کریں: راہل گاندھی 

کانگریس کے سابق قومی صدر راہل گاندھی نے آج ریجنل میڈیا کے نامہ نگاروں کے ساتھ ایک انتہائی اہم پریس کانفرنس کی جس میں ملک کے موجودہ حالات اور مرکزی حکومت کے ذریعہ اعلان کردہ معاشی پیکیج کے بارے میں کھل کر اپنا رد عمل ظاہر کیا۔ 20 لاکھ کروڑ روپے کے معاشی پیکیج کا حوالہ دیتے ہوئے راہل گاندھی نے پریس کانفرنس کے دوران پی ایم مودی سے گزارش کی کہ وہ کورونا وائرس کی وجہ سے ملک میں پیدا حالات کو سمجھیں اور معاشی پیکیج کے تعلق سے از سر نو غور کریں، کیونکہ لوگوں کو قرض کی نہیں بلکہ فوری طور پر پیسے کی ضرورت ہے۔

راہل گاندھی نے تقریباً سوا گھنٹہ تک چلی پریس کانفرنس کے دوران نامہ نگاروں سے بات چیت کرتے ہوئے کہا کہ کورونا بحران کے درمیان جاری لاک ڈاؤن نے کسانوں، مزدوروں، غریبوں کے سامنے کئی طرح کے مسائل کھڑے کر دیے ہیں۔ اس وقت وہ پیسے کی قلت محسوس کر رہے ہیں، انھیں پیسے کی ضرورت ہے اور یہ ضرورت پی ایم مودی کو پوری کرنی چاہیے۔ راہل گاندھی نے مزید کہا کہ "پی ایم مودی کو چاہیے کہ وہ ہندوستان کے دل کو دیکھ کر پیسہ دیں، نہ کہ غیر ملکی ریٹنگ پر توجہ دیں۔ ہندوستان میں اس وقت بحرانی کیفیت ہے، چھوٹے تاجر پریشان ہیں، ملک کا کسان پریشان ہے، مزدور بھی مشکل دور سے گزر رہا ہے۔ ایسے میں حکومت کی ترجیحات یہ ہونی چاہیے کہ وہ ان ضرورت مندوں پر توجہ دے، نہ کہ عالمی ریٹنگ پر۔"

اس موقع پر راہل گاندھی نے صحافیوں کا اس بات کے لیے شکریہ ادا کیا کہ وہ زمینی حقیقت کو لوگوں کے سامنے لا رہے ہیں، سچائی کو اپنی رپورٹ کا حصہ بنا رہے ہیں اور کورونا سے پریشان حال مہاجر مزدوروں سے لے کر غریب طبقہ کے مسائل کو سامنے رکھ رہے ہیں۔ میڈیا سے بات چیت کے دوران راہل گاندھی نے لاک ڈاؤن کے دوران مختلف حادثات میں ہلاک ہونے والے لوگوں کو خراج عقیدت بھی پیش کی۔ انھوں نے کہا کہ "لاک ڈاؤن سوئچ کی طرح نہیں ہے جس کو آن اور آف کر دیا جائے۔ اسے بہت احتیاط کے ساتھ ہٹایا جانا چاہیے۔ ہمیں بزرگوں کا خیال رکھنا چاہیے، بیماروں کا خیال رکھنا چاہیے اور خواتین و بچوں کا بھی خیال رکھنا چاہیے۔"