’پی ایم مودی اڈانی-امبانی سے متعلق بدعنوانی کی جانچ کرائیں‘، کانگریس نے وزیر اعظم کو پھر دیا چیلنج

نئی دہلی: اڈانی-امبانی کی بدعنوانی سے متعلق وزیر اعظم نریندر مودی کے بیان پر کانگریس نے اپنا حملہ مزید تیز کر دیا ہے۔ کانگریس ترجمان سپریا شرینیت نے آج اس معاملے میں کہا کہ ’’وزیر اعظم نریندر مودی نے اپنی شکست کو دیکھتے ہوئے اڈانی-امبانی کی بدعنوانی پر بڑا انکشاف کیا ہے۔ نریندر مودی اس بدعنوانی کی جانچ کرائیں اور اپنے متروں کے یہاں جانچ ایجنسیوں کے چھاپے ڈلوائیں۔‘‘

سپریا شرینیت نے یہ بیان نئی دہلی واقع کانگریس ہیڈکوارٹر میں پریس کانفرنس سے خطاب کرتے ہوئے دیا۔ انھوں نے کہا کہ اس ملک کا وزیر اعظم اتنا کمزور، بے بس اور مجبور اس سے پہلے کبھی نہیں رہا۔ مودی جی کا کہنا ہے کہ اڈانی اور امبانی ٹیمپو میں بھر بھر کر بلیک منی بانٹ رہے ہیں۔ نریندر مودی نے دیکھا کہ راہل گاندھی بے خوف ہو کر بدعنوانی کی قلعی کھول رہے ہیں، بڑی مستعدی سے بدعنوانوں کے خلاف بول رہے ہیں، اڈانی-امبانی کا پردہ فاش کر رہے ہیں۔ آخر کار راہل گاندھی کو دیکھ کر 10 سال بدعنوانی میں ڈوبے رہنے کے بعد وزیر اعظم نریندر مودی نے ہمت دکھائی اور بدعنوانی پر بڑا انکشاف کیا۔ سپریا شرینیت نے طنزیہ انداز میں کہا کہ یہ افسوسناک ہے جب وزیر اعظم الزام لگا رہے ہیں لیکن جانچ ایجنسیاں اور میڈیا خاموش ہے۔

کانگریس ترجمان کا کہنا ہے کہ وزیر اعظم مودی کے ذریعہ بدعنوانی سے متعلق کیے گئے انکشاف نے پوری بی جے پی اور حکومت میں ہلچل پیدا کر کے رکھ دی ہے۔ لوگ خوفزدہ ہیں، کیونکہ انھیں پتہ ہے کہ جب شکست دیکھ کر مودی جی اپنے جگر کے ٹکڑے کو قربان کر سکتے ہیں تو ہم کیا چیز ہیں۔ حکومت میں سب سے زیادہ امت شاہ ڈرے ہوئے ہں۔ اس کے علاوہ وہ افسر بھی خوفزدہ ہیں جو مودی جی کے اشاروں پر کام کر رہے تھے۔ یہ سبھی سمجھ گئے ہیں کہ حکومت بدلنے والی ہے۔ نریندر مودی تو جھولا اٹھا کر چل دیں گے، حساب ان سے مانگا جائے گا۔