پی ایم مودی ملک کے سب سے گھمنڈی لیڈر: پرینکا گاندھی

چترکوٹ: وزیر اعظم نریندر مودی کو ملک کا سب سے متکبر سیاست داں قرار دیتےہوئے کانگریس جنرل سکریٹری پرینکا گاندھی واڈرا نے پیر کو کہا کہ بھارتیہ جنتا پارٹی(بی جے پی) حکومت کو عوام کی دکھ تکلیف سے کوئی سروکار نہیں ہے اور ان کے لیڈر وں کو صرف اقتدار کی لالچ ہے۔ پارٹی امیدوار بابل کمار سنگھ پٹیل کے حق میں گرام کھوہ میں منعقد ایک انتخابی ریلی سے خطاب کرتے ہوئے محترمہ واڈرا نے کہا کہ مودی حکومت نے کسان، غریب، سرکاری ملازمین، شکچھا متروں کے مفاد کی کوئی پرواہ نہیں کی جبکہ حکومت کا کام ہے کہ وہ عوام کا بوجھ اٹھائے۔ان کےمسائل کو حل کرے۔

انہوں نے کہا کہ گذشتہ پانچ سالوں میں طرح سے طرح سے لوگوں کو ہراساں کیا گیا۔ آوارہ مویشیوں کے لئے حکومت نے دعوی کیا کہ گئوشالائیں بنائی جائیں گی۔ لیکن کچھ نہیں ہوا۔ دن بھر دپتی دھوپ میں کسان کھیتوں کی چوکیداری کر نے پر مجبور ہیں۔ کسان کی آمدنی دوگنی کرنے کا وعدہ حکومت نے کیا تھا جبکہ آمدنی آدھی ہوگئی۔

کانگریس جنرل سکریٹری نے دعوی کیا کہ ملک بھر میں12 ہزار کسانوں نے خودکشیاں کی ہیں اور فصل بیما کے پیسے سےسرمایہ کاروں کےجیبیں بھری گئی ہیں۔ کسانوں کو سالانہ 6 ہزار روپئے کی پیش کش کرنے والی کسان سمان ندھی اسکیم حقیقت میں کسانوں کے ساتھ مذاق ہے۔

محترمہ واڈرا نے کہا کہ ’’ آج سارے لیڈر اقتدار کی حرص وطمع سے گھرے ہوئے ہیں ان کا عوام کے دکھ و درد سے کوئی سروکار نہیں ے۔ جبکہ سچائی یہ ہے کہ عوام نے ہی انہیں اقتدار کی کرسی پر فائز کیا تھا۔ آج انہیں کو فراموش کیا جارہا ہے۔

بندیل کھنڈ کے کسانوں کی دکھتی رگ پر ہاتھ رکھتےہوئے انہوں نے کہا کہ بوندبوند پانی کے لئے جدوجہد کرر ہے بندیل کھنڈ میں وزیر اعظم کی ریلی سے قبل ٹیکروں سے سڑکوں کی دھلائی کی گئی جو بے حد شرمنا ک ہے۔