صفائی مہم سے ذمہ داری اور ری سائیکلنگ جیسے معاشی مواقع پیدا ہوئے: وزیر اعظم مودی

نئی دہلی: وزیر اعظم نریندر مودی نے اپنے ماہانہ ریڈیو پروگرام 'من کی بات' میں صفائی مہم کو جاری رکھنے کی اہمیت پر زور دیتے ہوئے کہا کہ اس مہم نے عوام، خاص طور پر سرکاری دفاتر کے ملازمین میں ذمہ داری کا احساس پیدا کیا ہے۔ انہوں نے بتایا کہ سرکاری دفاتر میں صفائی مہم کے ذریعے کئی پرانی اور غیر ضروری فائلوں کو ہٹایا گیا، جس سے جگہ کی فراہمی کے ساتھ کام کی روایت میں مثبت تبدیلی آئی ہے۔

انہوں نے کہا کہ صفائی کا رجحان اب معاشی فوائد کا ذریعہ بھی بن رہا ہے۔ پی ایم مودی نے ممبئی کی دو خواتین، اکشرا اور پراکرتی کی مثال پیش کی، جو کپڑوں کی کترنوں سے فیشن آئٹمز بنا رہی ہیں اور اپنے اختراعی کام کے ذریعے کچرے کو کارآمد بنا رہی ہیں۔

وزیر اعظم نے کانپور کے 'پلاگرس گروپ' کی تعریف کی، جو روزانہ گنگا کے کنارے کچرا صاف کر کے اسے ری سائیکلنگ کے ذریعے ٹری گارڈز میں تبدیل کر رہا ہے۔ اس اقدام نے نہ صرف شہر کی صفائی کو بہتر بنایا بلکہ عوامی شرکت کو بھی بڑھایا۔

اسی طرح، انہوں نے آسام کی اتیشا کی مثال دی، جو اروناچل پردیش میں پلاسٹک کے کچرے کو صاف کرنے اور مقامی لوگوں کے ساتھ مل کر وادی کو دوبارہ صاف کرنے میں مصروف ہیں۔ ان کی کوششوں سے نہ صرف صفائی ہوئی بلکہ مقامی لوگوں اور سیاحوں میں بیداری بھی پیدا ہوئی۔

وزیر اعظم نے عوام سے اپیل کی کہ وہ اپنے علاقوں میں ایسی کامیاب کہانیوں کے بارے میں لکھیں تاکہ ان کوششوں کو مزید تقویت دی جا سکے اور صفائی مہم کو ایک مسلسل عمل کے طور پر جاری رکھا جا سکے۔

(یو این آئی ان پٹ کے ساتھ)