’پی ایم مودی نے 2 کروڑ روزگار کی جگہ ہر سال 2 کروڑ نشہ کرنے والے بنا دیے‘، مدھیہ پردیش ڈرگس معاملہ پر کانگریس کا حملہ

مدھیہ پردیش کی راجدھانی بھوپال میں ڈرگس برآمدگی معاملہ میں کانگریس نے آج مدھیہ پردیش کی بی جے پی حکومت کے ساتھ ساتھ مرکز کی مودی حکومت کو بھی ہدف تنقید بنایا۔ مدھیہ پردیش کانگریس کے صدر جیتو پٹواری نے بھوپال میں کروڑوں روپے کی ڈرگس برآمدگی معاملہ کے ملزم سے مدھیہ پردیش کے نائب وزیر اعلیٰ جگدیش دیوڑا کے قریبی تعلقات کا حوالہ دے کر وزیر اعظم نریندر مودی اور وزیر اعلیٰ موہن یادو سے فوراً نائب وزیر اعلیٰ کا استعفیٰ لینے کا مطالبہ کیا ہے۔

جیتو پٹواری نے جمعہ کو نئی دہلی واقع کانگریس ہیڈکوارٹر میں پریس کانفرنس سے خطاب کرتے ہوئے کہا کہ صرف مدھیہ پردیش ہی نہیں بلکہ پورے ہندوستان میں نشہ کا کاروبار پھیل رہا ہے۔ ’اڑتا بھارت‘ والے حالات پیدا ہو رہے ہیں، کیونکہ ملک میں کوئی بھی ریاست نشہ کی گرفت سے بچا ہوا نہیں ہے۔ جیتو پٹواری نے کہا کہ ’’مودی حکومت نے پارلیمنٹ میں ایک رپورٹ پیش کی تھی جس میں بتایا گیا تھا کہ ملک میں تقریباً 40 کروڑ لوگ نشہ کرتے ہیں اور یہ تعداد ہر سال تقریباً 2 کروڑ 10 لاکھ بڑھ رہی ہے۔ یہ ایک حقیقت ہے، پی ایم مودی نے ہر سال دو کروڑ روزگار تو نہیں دیے، لیکن ہر سال دو کروڑ نشہ کرنے والے بنا دیے۔‘‘

بھوپال میں پکڑی گئی 1800 کروڑ روپے سے زیادہ کی ڈرگس فیکٹری کا معاملہ اٹھاتے ہوئے جیتو پٹواری نے کہا کہ مدھیہ پردیش میں نشہ اور اس سے جڑے مافیہ نے خوفناک حالات پیدا کر دیے ہیں۔ کئی ریاستوں میں ڈرگس کے تار بھوپال میں پکڑے گئے ڈرگس ریکٹ سے جڑے ہیں۔ ڈرگس کی فیکٹری چلانے والے ملزم کا نائب وزیر اعلیٰ جگدیش دیوڑا کے ساتھ رشتے سبھی کو معلوم ہیں۔ اس سے صاف ہے کہ ملزم بغیر سیاسی تحفظ کے اتنا بڑا جرم نہیں کر سکتا۔ مدھیہ پردیش کے وزیر اعلیٰ اور وزیر داخلہ موہن یادو اس طرح کے واقعات پر خاموش ہیں۔ وزیر اعظم مودی اور وزیر اعلیٰ کو چاہیے کہ وہ فوراً نائب وزیر اعلیٰ کا استعفیٰ لیں۔

پریس کانفرنس میں جیتو پٹواری نے بی جے پی لیڈرس کی ویڈیو کلپ دکھاتے ہوئے کہا کہ مدھیہ پردیش کے وزیر کیلاش وجئے ورگیہ کہہ چکے ہیں کہ ریاست میں گلی گلی میں نشہ فروخت ہوتا ہے۔ اس کے بعد مئو گنج سے بی جے پی رکن اسمبلی شراب مافیہ اور غنڈوں سے پریشان ہو کر پولیس کے سامنے لیٹنے کو مجبور ہو گئے۔ سینئر بی جے پی لیڈر اجئے بشنوئی نے اسے اپنے ’ایکس‘ پر شیئر کیا اور لکھا ہے کہ پوری حکومت ہی شراب ٹھیکیداروں کے آگے جھکی ہوئی ہے۔ جب بی جے پی لیڈران ہی اس طرح کی باتیں کر رہے ہیں تو پھر اس کے لیے کسی سرٹیفکیٹ کی کیا ضرورت ہے۔ انھوں نے کہا کہ بی جے پی لیڈرس کے بچے بھی نشہ کرتے ہیں، اس لیے وہ بھی اس کے خلاف آواز اٹھا رہے ہیں۔

جیتو پٹواری کا کہنا ہے کہ مدھیہ پردیش آج پوری طرح سے مافیاؤں کے چنگل میں ہے۔ ریاست میں شراب مافیہ، معدنیات مافیا، ریت مافیا، ایڈمنسٹریٹو مافیا سمیت تمام مافیا گروپ حاوی ہیں۔ مدھیہ پردیش میں مافیا کی حکومت ہے اور ہر طرف انہی کا بول بالا ہے۔ نشہ مافیا نے تو ہر طبقہ کو اپنی زد میں لے لیا ہے۔