تصویری جھلکیاں: دہلی میں پہلی بارش کے بعد ہی سڑکوں کا برا حال، ہر طرف پانی ہی پانی

نئی دہلی: راجدھانی دہلی کے لوگوں کو پہلی بارش کے بعد گرمی سے تو راحت مل گئی لیکن آبی جماؤ اور ٹریفک جام نے معمولات زندگی درہم برہم کر دئے۔ دریں اثنا، دہلی کے اندرا گاندھی بین الاقوامی ایئرپورٹ کے ٹی-1 کی چھت گرنے سے المناک حادثہ بھی پیش آیا اور ایک شخص کی موت ہو گئی۔

بھاری بارش کے بعد راجدھانی کی سڑکوں پر ہر طرف پانی ہی پانی نظر آیا اور آنے جانے والوں کو کافی دقتوں کا سامنا کرنا پڑا۔

انڈر پاسز کا اور بھی برا حال تھا اور ان سے گزرنے والی سڑکوں نے تو تالاب اور ندیوں کا روپ اختیار کر لیا۔

بھاری بارش کی وجہ سے ایک جانب جہاں بڑی گاڑیوں کو ٹریفک جام کا مسئلہ درپیش رہا تو سائیکل اور موٹر سائیکل پر سفر کرنے والوں کو چند میٹر طے کرنا بھی محال ہو گیا۔

کئی مقامات پر پانی بھر جانے کی وجہ سے ان کو پہچان پانا بھی مشکل ہو گیا۔ ریلوے اوور برج پر ٹرین گزرنے کے منظر کو قید کیا گیا تو تصویر رنگا رنگ ہو گئی۔

سب سے زیادہ پریشانی ان مسافروں کو ہوئی جن کی گاڑی بیچ راستہ بند ہو گئی۔ اس طرح کے لوگوں کو پانی سے بھری سڑکوں پر اپنی اسکوٹی یا بائیک کو دھکیل کر [لے جاتے ہوئے دیکھا گیا۔

جن لوگوں کو دفاتر پہنچنا تھا وہ یا تو دیر سے پہنچے کا پھر انہوں نے گھر سے ہی کام کرنے کا انتخاب کیا۔ اس دوران سڑکوں پر تو ٹریفک جام تھا، میٹرو میں بھی لوگوں کی بھاری بھیڑ جمع ہو گئی اور مسافروں کو ایک دوسرے سے دھکا مکی کرتے دیکھا گیا۔

دریں اثنا، کئی ملازمین، جنہیں میٹنگوں کے لئے دفاتر میں حاضر ہونا تھا انہوں نے ویڈیو کانفرنس کے ذریعے میٹنگ میں حاضری لگائی۔

ٹریفک جام کے دوران پولیس اہلکاروں پر دباؤ آ جاتا ہے، چنانچہ ٹریفک پولیس اہلکار جام کھلوانے کے لئے جدوجہد کرتے نظر آئے۔