عام لوگوں پر پڑ سکتی ہے مہنگے تیل کی مار، پٹرول جا سکتا ہے 80 کے پار

ملک کے بازاروں میں تیل کی قیمتوں میں ایک بار پھر آگ لگ سکتی ہے۔ اندیشہ ہے کہ خام تیل کی قیمتوں میں آئے زبردست اچھال کے بعد دہلی میں پٹرول کی قیمت 80 روپے فی لیٹر کو پار کر سکتی ہے۔ سعودی عرب کی سب سے بڑی تیل کمپنی آرامکو پر ڈرون حملے کے بعد پیر کے روز خام تیل کی قیمت 19.5 فیصد بڑھ کر 71.95 ڈالر فی بیرل پر پہنچ گئی۔ تیل ماہرین کا کہنا ہے کہ سعودی کمپنی پر حملے کا اثر آنے والے دنوں میں دکھائی دے گا۔ خام تیل ریکارڈ اونچائی پر پہنچ سکتا ہے۔ اس کے سبب ہندوستانی بازار میں بھی پٹرول 80 روپے فی لیٹر کے پار جا سکتا ہے۔

ماہرین کو لگتا ہے کہ اگر سعودی آرامکو میں پروڈکشن زیادہ دنوں تک ٹھپ رہا تو بین الاقوامی بازار میں خام تیل کی قیمتیں ایک بار پھر سے بڑھیں گی۔ اگر خام تیل 80 ڈالر فی بیرل کی سطح کے پار نکلتا ہے تو ہندوستانی بازار میں بھی پٹرول 80 روپے تک پہنچ سکتا ہے۔

غور طلب ہے کہ طویل عرصہ بعد پیر کو خام تیل میں سب سے بڑی تیزی دیکھی گئی۔ حالانکہ مرکزی وزیر برائے پٹرولیم دھرمیندر پردھان نے پیر کے روز کہا کہ سعودی عرب کے تیل پروڈکشن پلانٹ پر ہوئے حملوں کے بعد بھی ہندوستان کو تیل فراہمی میں کوئی دقت نہیں ہوگی۔ ہندوستانی سفیر تیل کی فراہمی کے لیے آرامکو سے رابطے میں ہیں۔

اس درمیان امریکی صدر ڈونالڈ ٹرمپ نے آرامکو پر ہوئے ڈرون حملے کے بعد اسٹریٹجک پٹرولیم ریزرو سے تیل کا استعمال کرنے کو منظوری دے دی ہے۔ انھوں نے کہا کہ سعودی عرب پر حملے کے سبب جس سے تیل کی قیمتوں پر اثر پڑ سکتا ہے، میں نے اسٹریٹجک پٹرولیم ریزرو سے تیل کے استعمال کو منظوری دے دی ہے، تاکہ ضرورت پڑنے پر بازاروں میں اس کی اچھی طرح سے فراہمی کی جا سکے۔

میڈیا رپورٹس کے مطابق ماہرین نے سعودی عرب میں خام تیل پلانٹ پر ہوئے ڈرون حملے کے بعد ہندوستان میں ڈیزل-پٹرول کی قیمتیں 5 سے 6 روپے تک بڑھنے کا اندازہ ظاہر کیا ہے۔ ہندوستان پٹرولیم کارپوریشن لمیٹڈ کا کہنا ہے کہ اگر خام تیل کی قیمتوں میں تبدیلی ہوتی ہے تو پٹرول-ڈیزل کی قیمتیں بھی بڑھ سکتی ہیں۔ نیوز ایجنسی رائٹرس نے ایچ پی سی ایل کے چیئرمین ایم کے سرانا کا حوالہ دیتے ہوئے کہا کہ اگر خام تیل کی قیمت میں 10 فیصد تک اضافہ جاری رہتا ہے تو ایندھن کی قیمت متاثر ہو سکتی ہے۔

حالانکہ خام تیل کی قیمتوں میں اضافہ ہونے کے باوجود ملک کی سرکاری آئل مارکیٹنگ کمپنیوں نے ڈیزل و پٹرول کی قیمت میں کوئی تبدیلی نہیں کی۔ پیر (16 ستمبر) کو راجدھانی دہلی میں پٹرول 72.03 اور ڈیزل 65.43 روپے فی لیٹر رہا۔